In Tuaisceart Éireann, est a nàrrere sos tretos irlandesos chi galu faghent parte de su Rennu unidu, su Sinn Féin nche brincat sos unionistas de su Dup e, cun su 29% de sos cunsensos, nche lompet a sa prima positzione in sas eletziones in pessu acumpridas. Sos tzitadinos nordirlandesos fiant cramados a s’apuntamentu pro rinnovare sos cumponentes de s’assemblea parlamentare de Stormont.
Finas a oe su Sinn Féin e su partidu unionista democràticu aiant ambos 27 e 28 iscrannos movende dae una pertzentuale belle che pare: 28,1% su Dup e 27,9% sos de Gerry Adams e de Michelle O’Neill (in sa foto cun su murale). Como sos republicanos sotzialistas tenent unu vantàgiu de prus de 7 puntos dae sos cuncurrentes, ma su datu est partziale e duncas galu no ischimus comente s’ant a partzire sos sègios.
A su presente nd’ant atribuidu 47 de 90 gasi partzidos: 18 a su Sinn Féin, 12 a su Dup, 8 a Alliance, 4 a Ulster unionist party, 3 a su Social Democratic and Labour Party («the party platform advocates Irish reunification»), 1 a sa Traditional unionist voice, 1 a as boghe “indipendents”.
Lassende·nche a banda sos de Alliance («it professes to be the only significant party which does not base its political stance around the constitutional question») sa majoria atuale e provisòria (Sinn Féin + Sdlp) est pro sa re-unificatzione de s’Irlanda. Finas a como in Stormont b’aiat 40 eletos unionistas, 40 natzionalistas e 10 «designated as neither unionist nor Irish nationalist, but ‘Other’».
Su resurtu eletorale, mancari non definitivu, rifletet sa crèschida in sa sotziedade de sa punna republicana e indipendentista e sa de s’unidade natzionale de sas 32 conteas.
Sas eletziones fiant su 5 de maju e in die de gianteris ruiat s’anniversàriu de sa morte de Bobby Sands, rèndidu 41 annos a como in Long Kesh a pustis de s’isciòperu de su fàmene de sos presoneris republicanos contra a su regime disumanu de s’amministratzione penitentziària de su Rennu unidu.
màuru piredda
Leave a comment