Est su Dipartimentu de Ingegneria elètrica ed eletrònica de s’Universidade casteddaja su binchidore de su prèmiu “Google 2022 Security and Privacy Research Award”. Su reconnoschimentu l’aiat assignadu – durante una cunferèntzia in lìnia – su team de chirca Google chi si òcupat de abusu, privadesa e seguresa e sa destinatzione est sa de sustènnere s’atividade de chirca in contu de intelligèntzia artifitziale segura conduida dae su Prof. Battista Biggio intre su PraLab cun unos cantos collaboradores.
«Su prèmiu – narat sa lìtera de parabenes ufitziales de s’azienda de Muntain View, firmada dae sa responsàbile de sa chirca in contu de anti-abusu e seguresa, Elie Bursztein – cunsistet in una donatzione non vinculada de 50.000 dòllaros chi cherimus ofèrrere pro mèdiu de s’istitutzione bostra, comente reconnoschimentu pro sa chirca supra de s’aprendimentu automàticu ‘adversal machine learning’. S’intentu nostru est su de sustènnere sa chirca in custa diretzione».
Su curriculum de su Prof. Biggio est ricu de a beru; medas sunt sos reconnoschimentos internatzionales e sas tzitatziones iscientìficas, e bastat de lèghere sa pàgina sua in GitHub chi si faghet in presse a cumprèndere pro ite est unu de sos iscientziados prus tzitados in Itàlia in contu de computer (computer scientist).
Gianfranca Orunesu
(foto Pix4free)
Leave a comment