Su Pentàgonu est isperimentende s’intelligèntzia artifitziale aplicada a sa gherra. Sa tecnologia in chistione l’est aplichende a sos drones de cumbatimentu: s’aèreu XQ-58A Valkyrie bolat sena pilota e a lu gestire est, difatis, s’IA.
Su drone (unu protòtipu, pro como) in ogetu – produidu dae Kratos Security and Defence Solutions – est alimentadu in bolu dae unu motore coete e podet corfare bersàllios addae de su ràgiu visivu suo. Cun totu sas dudas e sos oriolos chi essint a pìgiu: semus faeddende de un’arma mortìfera, dotada de una tzerta autonomia, chi podet cajonare resurtados fatales.
E non si podet pònnere a banda su problema (unu de sos prus rilevantes) chi pertocat s’intelligèntzia artifitziale: su fenòmenu “Hallucination”, est a nàrrere s’incapatzidade de distìnghere realidade e datos fitìtzios chi produit fartas finamentas in s’individuatzione de sos bersàllios.
Medas sunt sos cunsideros de fàghere in contu de ètica, mancari siat un’ossìmoru a acurtziare s’ètica a sa gherra.
Gianfranca Orunesu
(Fonte immàgine: Wikipedia)
Leave a comment