Custu mangianu, in s’ospidale San Michele de Casteddu ant festadu sos 30 annos de sa Cardiologia Pediàtrica de s’Azienda de rilievu natzionale e arta ispecializatzione Brotzu.
A aberrere su repartu, in su 1992, est istadu su diretore de sa Cardiologia de tando, Valentino Martelli, chi aiat formadu unu grupu operativu de primore cun cardiochirurgos, cardio-anestesistas e cardiologos. S’atividade, ambulatoriale in printzìpiu, est crèschida fintzas a cando, in su 1998, no est naschida s’istrutura simpre in su repartu de Pediatria, pro divènnere a pustis un’istrutura dipartimentale autònoma in su 2002, cun personale e logos dedicados, e in fines istrutura cumplessa in su 2013.
Oe s’istrutura cumplessa faghet belle 6 mìgia controllos a s’annu e 2 mìgia primas valutatziones a sas cales s’annanghent 500 indàgines prenatales subra de sa funtzione cardiaca de su fedu, possìbiles dae sa de 12 chidas de gestatzione, e 80 protzeduras interventìsticas e diagnòsticas invasivas.
“Unu percursu in crèschida chi at dadu bida a sa chi oe si podet definire una de sas mègius istruturas in su sistema sanitàriu regionale e aterue puru” at narau su Presidente de sa Regione Christian Solinas.
“A oe – at sutaliniadu s’assessore Nieddu – sos patzientes sighidos cun diàgnosi atzertada de cardiopatia congènita sunt belle 9 mìgia, intre mannos e minores, e totus tenent bisòngiu de controllos periòdicos”.
Pro cumprèndere s’importàntzia de s’atividade de sos ispetzialistas chi traballant in su repartu, est pretzisu a nàrrere chi sa cardiopatia congènita rechedet chi su patziente lu sigat su cardiòlogo pediàtricu pro totu sa vida.
Mariantonietta Piga