Su 14 e su 15 de maju est in programma in Ceraxus su recùperu de sa finale, prevista in santandria de su 2020, de sa de trèighi editziones de su prèmiu Andrea Parodi, organizada dae sa fundatzione omònima, cun sa diretzione artìstica de Elena Ledda.
Sa sede est su teatru Si’ e Boi e sa manifestatzione at a èssere disponìbile in lìnia in sa pàgina facebook de sa Fondazione.
Ant a partetzipare custos artistas: Alessio Arena (Campania/Catalogna); Ars Nova Napoli (Campania); Eleonora Bordonaro (Sitzìlia); Elena D`Ascenzo (Abruzzo); Kalascima (Salento); Abramo Laye Senè & Gaalgui World Music Band (Senegal/Sitzìlia); Maria Mazzotta (Salento); Danilo Ruggero (Sitzìlia); Stefania Secci Rosa (Sardigna/Portogallu); Still Life (Catalogna).
A detzìdere sos binchidores ant a èssere sa giuria tècnica, fata dae musitzistas e professionistas de su setore e sa giuria crìtica, fata dae giornalistas e crìticos musicales.
Semper in su mese de maju, su 31, iscadit s’iscritzione a s’editzione noa, sa de batòrdighi, in programma in Casteddu sas dies 7 e 9 de santugaine. Su prèmiu, che ogna annu, est riservadu a sas cantzones chi podent èssere cunsideradas espressione de sa world music.
Pro s’iscrìere sos partetzipantes depent imbiare duos cumponimentos, cun testu puru, cun tradutzione in italianu e su curriculum. Pro su binchidore ddo’est sa possibilidade de partetzipare a cuntzertos o esibitziones musicales in su 2022 e in prus una bussa de istùdiu de 2.500 èuros.
Est previstu puru su prèmiu de sa crìtica: pro chie binchet unu videoclip realizadu de badas dae sa fundatzione.
Su prèmiu Andrea Parodi est dedicadu a s’artista nàschidu in Portu Turres in su 1955 e mortu in Cuartu in su 2006. A pustis de àere fatu parte de sos grupos Sole Nero, Coro degli angeli e Tazenda si fiat dedicadu a una carriera solista.
(gianni muroni)
Leave a comment