GAVOI. “No est nen patriarcale e nen matriarcale, diat èssere prus pretzisu chistionare de sa sotziedade sarda comente matrilineare o matritzèntrica”, cun custas paràulas Claudia Sedda, sìndiga de Gavoi, sa prima fèmina chi at otesu cust’ingàrrigu in sa bidda barbaritzina, at serradu sa Summer School “Pensare su femininu, pensare a su femininu, a chent’annos dae su conferimentu de su Prèmiu Nobel a Gràtzia Deledda”, chi est istadu fatu dae su gioja a su sàbadu de sa chida passada in Gavoi.
Su cuntzeddu torrat a manigiare un’idea chi Giuseppe Dessì aiat propostu in sos annos Chimbanta de su Noighentos, dada a connòschere e ispiegada in sos addobios in ue s’est arresonadu su tema de su “fimininu” in Sardigna.
Una chimbantina de istudiosos e istudiosas ant àpidu ocasione de si pònnere cara a cara chistionende de autoras trascuradas, e subra de temàticas de atualidade manna, che a su femonatzionalismu e a su post-umanu. Est istada onorada sa figura de Bachìsiu Bandinu e sunt istadas tocadas analisis de sas ideas de Luce Irigaray e Alba de Cespedes, Virginia Woolf e Ali Smith, Ildegarda di Bingen e Anna Maria Ortese.
Sa manifestatzione est ammaniada dae sa Sotziedade Italiana universitària de Tàtari, cun su contributu finantziàriu de sa Fundatzione de Sardigna, s’agiudu logìsticu de s’assòtziu Malik de Gavoi, s’agiudu de s’ateneu turritanu e de àteros assòtzios de su Nord de Sardigna. Sa Summer School diat pòdere èssere unu atopu fissu in sa programmatzione de s’Amministratzione.
In foto Claudia Sedda.
Leave a comment