Pagu mancat a sa de chimbe editziones de “Invasione poetica” (dae su 1 a su 19 de trìulas). Inoghe su programma intreu. Pro s’ocasione amus fatu carchi pregonta a Enrico Mura, vitzesìndigu e assessore de sa Cultura de sa Comuna de Gavoi.
Ocannu est sa de chimbe editziones. Bastante particulare. Ite bos isetades?
Su corona virus paret chi apat asseliadu e sa cultura bogat sa conca a foras pro sa prima borta a pustis de totu custu agorru. Invasione PoEtica sos àteros annos comintzaiat in beranu a printzìpios de maju, ma a la tramudare a trìulas nos at dadu manera de buscare poetas de importu mannu e a sa gente de los oviare in mesu de pratzas e carreras in custu istiu caentosu gavoesu abituadu a acasagiare istrangia dae totu su mundu pro su Fèstival de Literadura L’Isola delle Storie. Fèstival chi ocannu, a dolu mannu, non b’est istadu, ma su sòtziu nch’est ammaniande s’editzione pro su 2021 ca sa bidda, e no issa ebbia, nde tenet istima meda.
In custa editzione b’at a èssere fintzas sa gara a bolu, ma in intro de sas invasiones poèticas no est mancada mai sa limba sarda. Cale venidore pro sas artes nostras?
Pro sa prima borta aberimus s’aghidu poèticu cun una gara a bolu de sos cantadores Alessandro Arca de Silanos e Nigola Farina de Orgòsolo e su Cuncordu de Gavoi ca pensamus, dae semper, chi tocat de agatare totus sa maneras de sighire a chistionare in sardu, ca sa limba e sos limbàgios de poetas e iscritores, ma fintzas sa de sos pitzinnos e mannos est limba de s’afetu e arramenta giusta pro oviare su mundu, pro cumprendere, istudiare, cantare e contare, pro podere chistionare de arte, mùsica, culturas, tzìnema, fìsica, iscièntzia. Comente faghimus cada annu cun LIMBA Paràgulas, Identidades, Culturas, atòbiu chi ammaniamus a printzìpios de nadale dae tres annos. Comente cada limba, su sardu, nos permitit de lèghere e argumentare sas cosas de su mundu. Cando si perdet una limba si perdent sos ogros pro abbaidare in manera diferente a cussu mundu. E pro Invasione Poetica amus semper mantesu sa propria atentzione a sa limba sarda.
Fèstival “Isola delle storie”, Invasiones poèticas, rassigna Limba. Gavoi bidda de cultura?
In bidda, a sa cultura l’amus dadu dae semper importu mannu ca s’est cumpresu deretu chi sa persone chi tenet cultura, cale si siat, tenet sa possibilidade de cumprèndere chie est issu, in manera de si podet cunfrontare cun s’àteru e cun su restu de su mundu chene perdere unu tzantzi de dignidade; sa bidda goi balanzat in prus de unu sensu.
A cada manifestatzione de custa casta, duncas, totus ghetant una manu de azudu. Invasione PoÈtica, pro esèmpiu, est unu traballu ue ant b’aere sòrtidos su Comune, su sòtziu ProcivArci, Sardegna Poetry Slam, sa Commissione de democratzia partetzipativa Cultura e Identidade e àteros s’ant a azunghere.
M’aùguro chi siant tres dies ue sa paràgula e s’atzione poètica nos azudent a agatare àndalas novas pro podere pensare e faghere unu tempus benidores menzus de su chi amus connotu ispera·nde chi non torret a annuare.
Leave a comment