Impostada mortale in Ulìana a sas 6 e mesu de custu mangianu.
A Tonino Corrias, 59 annos, allevadore, l’ant mortu isparadu in intro de sa vètura: fiat in pessu essidu dae domo sua pro andare a sartu, in localidade Sa trave, ue aiat sa sienda.
L’ant mortu a pagu tretu dae su munitzìpiu, in su coro de sa bidda. Un’impostada pessada bene, in unu gurutu astrintu, chi no at permìtidu a Corrias de si fuire.
A su logu sunt supridos sos Carabineris de sa Cumpangia de Nùgoro e de su Nùcleu Investigativu de su Cumandu Provintziale de Nùgoro. Sos ispetzialistas de su RIS ant fatu sos rilievos pro àere sos elementos netzessàrios pro aviare sas indàgines.
Como sos Carabineris ant a compudare sas màgines de sas telecàmeras de sorvegliàntzia a fùrriu pro averiguare si si bidet chie est istau e si sunt prus de una pessone.
Est arribadu peri su capu de sa Procura de Nùgoro Patrizia Castaldini, su sostitutu Ireno Satta, chi at a coordinare sas indàgines, e su dutore legale.
Tonino Corrias est renèssidu a si sarvare dae àteras duas impostadas. Sa prima in martu de su 2001, cando aiant isparadu a fusiladas su mezu ue cun issu fiat biagiende su babbu puru: a Corrias l’aiant fertu a unu bratzu e a unu coddu. Fiant sos annos dae su 1999 a su 2003, cando in Ulìana fiant capitados unos cantos omitzìdios ligados a reatos graves.
Sa de duas impostadas, in santandria de su 2015: Corrias fiat in vetura e unas cantas fusiladas aiant fatu a frichinias su bidru, issu si fiat sarbadu.
Mariantonietta Piga