In sa pellìcula de su 2004 Il bandito corso, dirìgida dae Alain Berbarian, est posta in iscena una de sas aventuras de s’investigadore privadu Jack Palmer. Su protagonista est s’eroe de una sèrie de fumetos ideados e realizados dae Renée Pétillon, unu de sos nùmenes mannos de sas bandes dessinées, mortu in su 2018.
Su contu publicadu in su 200 est su chi serbit comente iscenegiadura a su filmi.
Intituladu L’Enquête corse faeddat de unu traballu chi a Palmer dd’ant cumandadu de fàghere in s’Ìsula de sa Bellesa, comente ddi narant sos frantzesos.
Su tonu, che a su de sos giornalinos chi dd’ant ispiradu, est còmicu.
Su contu cumintzat cun Palmer chi lompet a Còrsica incarrigadu de una chistione chi paret de nudda: atzapare a su destinatàriu de un’eredidade.
Ma s’investigadore imbetzes finit in mesu de su mundu de su separatismu corsicanu. Sa trama oferit s’ocasione pro dare una rapresentatzione irònica de sas caraterìsticas positivas e negativas de sos isulanos e de sas costumàntzias issoro.
Intre bombas, atendados e movimentos indipendentistas chi naschent unu in fatu de s’àteru su detective bènnidu dae su continente frantzesu iscoberit unu mundu fatu de cantos traditzionales, licore de murta e brigas pro sos benes chi durant totu sa vida.
Una realidade chi s’ispetadore sardu s’at a connòschere. A istabilire un’acàpiu finas fìsicu cun sa Sardigna ddo’est sa presèntzia de Caterina Murino, chi intèrpretat su personàgiu feminile printzipale.
Sos protagonistas sunt Christian Clavier, in su ruolu de Jack Palmer, e Jean Reno in su de su bandidu. Clavier est connotu in Itàlia massimamente pro I visitatori e Asterix e Obelix contro Cesare e Asterix e Obelix missione Cleopatra, mentras Reno at connotu sa fama internatzionale cun Nikita e est istadu protagonista cun Clavier etotu de I visitatori.
(gianni muroni)
Leave a comment