Hunter Field Target: un'isport nou pro sa Sardigna

Hunter Field Target: un'isport nou pro sa Sardigna

B’est un’isport chi si faghet in foraidda, e finamentas in su padente, isfida•nde•si cun àtera gente a chie ispara mègius. Paret catza ma animales non si nde òchint, e finas sas pessones de seguru non si podent fagher male. Cust’isport si narat Hunter Field Target, chi bortadu cheret nàrrere catza a bersàllios de campu. Est nàschidu in su Rènniu Unidu pro fìnghere sa catza minuda a sos animales dannàrgios, como chi est creschende est perdende a bellu a bellu sos sinnos chi ammentant sa parte sambenosa de cuss’atividade.

Dae una croba de annos in Sardigna esistit s’assòtziu Hunter Field Target Sardigna chi contivìgiat sa crèschida de cust’isport. Dae un’annu a como est paris cun sa FINS (Federatzione Isport Natzionale Sardu) e dae pagu at incumintzadu a porfiare in sas garas internatzionales comente natzionale sarda. Sos resurtados de su mundiale 2019 non sunt gasi male: no semus lòmpidos ùrtimos e semus supridos prima de sa Germània. Paga cosa, ma meda pro un’isport chi in Sardigna at cròmpidu duos annos ebbia. Sa sea de su Hunter Field Target Sardigna est in Boroneddu: una bidda minuda e galana a curtzu de Ilartzi. Su sèberu de su logu naschet dae sa bogia de istare in su tzentru de s’ìsula, gasighì chie cheret inghitzare cust’isport non depet biagiare tropu, ma finas pro amparare una bidda chi si nche est ispopulende.

Su Hunter Field Target est unu isport chi podet fàghere calesisiat pessone: giòvanos o mannos, fèminas o òmines. In su campu de giogu b’est unu caminu sinnadu, in ue bi sunt logos numerados in ue isparare a bersàllios postos in mesu a s’erva o subra de sas cambas de sos àrbores. S’isparadore non ischit cantu sunt a tesu e non podet cambiare s’impostatzione de su mirinu òticu chi giughet in su fusile. Non si podent impreare mancu mecanismos chi acontzant mìria e mirada. Totu est lassadu a s’ogru bonu de s’isparadore, chi giughet una possibilidade pro cada postatzione: si betat in frimmu ebbia b’est unu puntu, ma si sa balla minore iscudet su tzentru de su bersàlliu sos puntos sunt duos.

Chie cheret acurtziare·si a cust’atividade sa prima cosa chi depet fàghere est proare. Su sòtziu, ammanigia onni tantu carchi presentada, ma sa mègius cosa est de andare a Boroneddu, connòschere sos àteros atletas, e colare una die cun issos. Su Hunter Field Target non est unu isport assoladu, ma est un’isfida intre pessones e intro a s’isparadore matessi. A pustis benit però sa connoschèntzia de sos trastes e pro cussu bisòngiat de sighire carchi cursu in su sòtziu. Nudda de gasi longu, cussu chi serbit pro impreare bene s’arma in sa gara, e pro ascurtare sos cussìgios pro cale fusile a aera cumpressa e cale mirinu cumbenit de comporare. Su gastu non est mannu, meda de mancu de unu fusile de catza. Ma si unu est bravu, podet intrare in sa natzionale sarda e girare s’Europa pro sos campionados: sas ocasiones pro cumprèndere si unu est bonu non mancant de tzertu. Su 12 de ghennàrgiu est acabbadu su trofeu de ierru, e su 15 de martzu incumintzat su campionadu natzionale sardu.

Gabriele Tanda

Leave a comment

Send a Comment

S'indiritzu email tuo no at a èssere publicadu. Is campos pedidos sunt signados *