In Haiti est nàschidu in bia ufitziale su Cussìgiu presidentziale de transitzione, chi diat dèpere torrare s’istadu caraìbicu a sa normalidade democràtica a pustis de sas violèntzias de sos ùrtimos meses.
Su bulletinu ufitziale Le Moniteur chenàbura 12 de abrile nd’at annuntziadu sa formatzione e at comunicadu chi su Cussìgiu at a esertzitare poderes presidentziales finas a s’eletzione de unu presidente nou, intro sa die 7 de freàrgiu de su 2026.
Nde faghent parte personalidades in rapresentàntzia de partidos polìticos, movimentos de opinione, sotziedade tzivile e de sos diferentes acordos siglados pro chircare de nde bogare dae sa cunditzione de caos sa ex colònia frantzesa.
Sos esponentes de custu organismu sunt: Smith Augustin, in rapresentàntzia de sas piataformas polìticas EDE/RED e Compromis Historique, diplomàticu espertu in sas relatziones latinoamericanas e ex ambasciadore de Haiti in sa Repùblica Dominicana; Louis Gerald Gilles, ex senadore, in rapresentàntzia de s’Acordu de su 21 de nadale de su 2022, firmadu intre su Primu Ministru Henry e istrutura sotziales e polìticas pro una transitzione inclusiva e eletziones trasparentes; Fritz Alphonse Jean, ex guvernadore de sa Banca Tzentrale, in rapresentàntzia de su Montana Accord, chi leat su nùmene dae s’hotel in ue est istadu firmadu su documentu su 30 de austu de su 2021; Edgard Leblanc Fils, ex presidente de su Senadu, in rapresentàntzia de su colletivu firmatàriu de s’acordu de su 30 de ghennàrgiu de su 2023; Laurent Saint-Cyr, in rapresentàntzia de su setore econòmicu e finantziàriu; Emmanuel Vertilaire, pro su partidu Platfòm Pitit Desalin; Leslie Voltaire, in rapresentàntzia de su partidu Fanmi Lavalas.
In prus ddoe sunt duos osservadores chi non tenent deretu de votu: Regine Abraham, de su REN (Rassemblement pour une Entente Nationale et Souveraine), e Frisnel Joseph, chi rapresentat sa sotziedade tzivile.
(gianni muroni)