Eris in Thiniscole, tzentru printzipale de sa Baronia e segundu Comune prus mannu in fatu a Nùgoro in totu sa provìntzia, b’at àpidu una protesta pro chi sa Guàrdia mèiga de carrera de Roma abèrgiat regulare. Dae unas cantas dies, difatis, s’istrutura est serrada e sos tzitadinos chi a cue bi lompent pro bisòngiu si nch’agatant cun un’avisu de pagu giudu: «Il punto di guardia medica rimarrà chiuso nella giornata odierna per mancanza di personale». Sa chida colada fiat semper serrada e eris unu mèigu est arribbadu dae Aristanis a ora de sas noe de sero (dae sas deghe de mangianu, sende sàbadu, chi deviat èssere aberta). Non s’ischit cantu su servìtziu potzat èssere garantidu in custa chida intrende·nche e non s’ischit si at a abèrrere in sas àteros Comunes de su distretu. Nen si ant a abèrrere sas guàrdias mèigas turìsticas de Santa Luchia e de Sos Àlinos, in sas costeras de Thiniscole e de Orosei. Sa situatzione est grave ca custas serradas cajonant unas cantas – e evitàbiles – trasfertas de suferèntzia conca a sos presìdios de emergènztia (pronto soccorso) de Nùgoro e de Terranoa, giai bastante suferentes pro parte issoro. E sa situatzione est grave mescamente in custu perìodu cun sa crèschida de sa populatzione turìstica e de sos cundidos dae s’undada noa de covid. Sa protesta est comintzada a ora de sas oto de sero e, mancari in sàbadu, una chèntina de persones at animadu s’atopu. Intervènnidos tzitadinos de su logu, sos esponentes de sos grupos consiliares de minoria ma finamentas su sìndigu e sa segretària natzionale de Rossomori. Sa de eris non fiat petzi una protesta pro sos deretos de sos patzientes ma finamentas pro sos deretos de sos traballadores de sa sanidade vìtimas de turnos graes e finamentas male pagados. Sa punna de sos organizadores de s’atopu de eris est sa de fàghere crèschere sa protestas in sas àteras biddas interessadas.
màuru piredda
Leave a comment