Ocannu duos giòvanos sardos de gabbale, Stefania Carta e Alessio Pani, dant ondras a sa prèmiu Nobel Gràtzia Deledda, publichende su libru “Sònnios de Ierru – Contos de Pasca de Nadale”, una regorta de contos e poesias de s’iscritora nugoresa bortados in limba sarda. Si tratat de òperas iscritas dae su 1894 e su 1930. In su libru non b’at sceti custos traballos, ma finas sas costumàntzias antigas de Pasca de Nadale collidas dae s’iscritora pro sa “Rivista delle Tradizioni Popolari Italiane” e irrichidas dae prus de sessanta illustratziones.
Ma custu traballu no est àteru si non su filu de un’ordimìngiu prus mannu. In su cuntestu de s’ativismu linguìsticu sardu, s’itiresa Stefania Carta, laureada in Mediatzione Linguìstica e Culturale, at bogadu a campu progetos de importu, promovende s’impreu de sa limba sarda in su setore literàriu e culturale. Unu de custos est sa comunidade “S’Arda Tolkien Sardegna”, dedicada a s‘istùdiu e a s’ispainamentu de sas òperas de J.R.R. Tolkien. Cun s’infodiàriu “S’Arda Tolkien Sardegna,” issa impitat sa limba sarda in sos mèdios sotziales e, in su 2021, at publicadu su primu libru in sardu dedicadu a Tolkien, “S’Alfabetu de sos Hobbit.”
In su 2022 Stefania Carta at finas collaboradu cun Alessio Pani, laureadu in informàtica chi istat in Ispagna, pro su progetu “Ite mi contas?”. Custu infodiàriu, totu in limba sarda, est dedicadu a sa literadura mundiale, illughentende sa diversidade culturale e linguìstica de su patrimòniu literàriu internatzionale. Alessio Pani, in prus de cuidare s’infodiàriu de divulgatzione tecnològica “Sardumatica”, si interessat finas de disinnos de tradutzione de aplicatziones e programmas, agiuende in custa manera a ispainare s’impreu de su sardu in su cuntestu digitale.
Su traballu de Carta e Pani, cheret craridu, no est isuladu, ma si insertat in unu movimentu linguìsticu mannu, in ue giòvanos e prus pagu giòvanos gherrant cada die pro bogare sa limba sarda dae s’acorru in ue nche l’ant posta sèculos de colonizatzione linguìstica.
sa redatzione
Leave a comment