– de Salvatore Serra –
Bard tenet sas dies contadas. L’aiant presentadu in presse in presse sceti un’annu a como comente resposta a s’irrùmpida de ChatGPT de OpenAI, pro propònnere un’alternativa automàtica de resposta cunversatzionale. Però fiat sceti unu modelllu essidu de reghente dae sos laboratòrios de Google, in ue pustis ant sighidu a isvilupare su sistema chi punnat a èssere definitivu: Gemini. Sa multinatzionale at annuntziadu chi Bard si cunvertit in Gemini e est disponìbile in sa web e in aplicatziones pro telefoneddos cun sistemas Android e finas con iOS (Apple). In una prima fase b’est sa versione in inglesu ebbia; pustis s’at a ispainare a idiomas asiàticos comente su giaponesu e su coreanu e a s’ispagnolu. Sas versiones a pagamentu ant a permìtere s’impreu in ainas de traballu comunas comente sos documentos o curreos electrònicos. S’aplicatzione noa donat respostas a pregontas iscritas o orales e interagit cun sas imàgines. At a èssere s’assistente printzipale de su telèfonu, a ue s’at a pòdere atzèdere cun una intrada direta noa o cun su cumandu de boghe (Hi Google) o colende in sos incurtziadàrgios de su terminale. S’ant a pòdere mantènnere sas cunversatziones, e s’ant a pòdere torrare a leare dae su telefoneddu o dae s’elaboradore de iscrivania.
Leave a comment