A pustis de su progetu teatrale (cun s’ispetàculu “La conosci Giulia?”), de sa chirca, de sos cursos de formatzione, de sos cunvegnos, de sas dibatas cun s’obietivu de pònnere s’atzentu subra de sa chistione de gènere, arribat pro “Giulia Giornaliste Sardegna”, s’assòtziu chi gherrat pro un’informatzione inclusiva, s’esòrdiu suo in su mundu editoriale.
Gasi, sa rete de “Giornaliste Unite Libere e Autonome” (dae cue s’acrònimu “Giulia”) isterret unu passu nou in s’evolutzione comunicativa. Pro mèdiu de su coordinamentu sardu de s’assòtziu natzionale (nàschidu in su 2017 gràtzias a Susi Ronchi), naschet su libru “Un giorno all’improvviso – i racconti delle donne al tempo del Covid”. Su volume collit testimonias chi mustrant su coràgiu e sa determinatzione pro afrontare problemas, suferèntzias e agatare solutziones. Unu diàlogu intre 16 professionistas e periodistas sòtzias de Giulia Sardegna in ue s’ammisturant paràulas, ammentos, emotziones e miradas diferentes chi, paris, dant un’immàgine de su dramma bìvidu dae sas fèminas chi ant pagadu unu preju artu meda.
S’òpera (ideada dae Giulia Giornaliste Sardegna, responsàbile editoriale Susi Ronchi, coordinamentu editoriale Alessandra Addari), at a èssere presentada martis su 13 de cabudanni a sas 18 in Casteddu in sa Fondazione Sardegna. Una regorta de retratos firmados dae Daniela Zedda, a curtzu de sos de Elisabetta Messina, agiunghent valore a su libru.
Gianfranca Orunesu
(Foto Ansa)