Cumintzada in Leggiuno, sa vida de Gigi Riva est finida in Sardigna, a in ue fiat lòmpidu, galu minorenne, in su 1963, pro non si nch’andare prus.
Lunis 22 de ghennàrgiu su coro de s’ex giogadore at tzèdidu de su totu in s’ispidale de Casteddu, a pustis de una prima crisi cardìaca in domo.
Su mègius atacante in s’istòria de su fùbalu italianu fiat nàschidu in su 1944. Sa prima iscuadra in ue aiat giogadu a livellu professionìsticu est istada su Legnano. A pustis de un’annu de militàntzia in màllia lilla in sèrie C, su cartellinu dd’aiat comporadu su Casteddu, issara in sèrie B.
Cun su campione lombardu s’iscuadra casteddaja at otènnidu in antis sa prima promotzione in sèrie A e a coa at bintu su campionadu in s’istasione 1969/70. Su cuntributu suo a sas fortunas de su Casteddu est istadu fundamentale: at bintu tres bortas su tìtulu de cabucannonieri, in su 1966/67, in su 1968/69 e in fines pròpiu s’annu de sa conchista de su tricolore.
Su nùmeru 11 mancosu at bestidu ateruna màllia ebbia, sa de sa natzionale italiana, chi est cannonieri assolutu cun 35 gol in 42 partidas e chi cun issu at logradu resurtados chi non bidiat dae sos annos ’30, in antis cun sa vitòria de s’Europeu de su 1968 contra a sa Jugoslàvia, binta in sa ripetitzione de sa finale, poscas de su 1-1 de sa prima partida, pro 2-0, e a pustis cun sa finale mundiale pèrdida contra a su Brasile in su ‘70.
Sa figura de Riva est ligada a sa Sardigna prus a in ie de su livellu isportivu. Dae unu primu momentu chi fiat detzìdidu a si nche torrare luego a continente, aizu faladu dae s’aparèchiu chi dd’aiat giùghidu a Casteddu dae terramanna, a bellu a bellu su raportu suo cun s’Ìsula si fiat fatu de gasi forte chi fiat bènnidu a èssere sardu issu puru, tantu de nàrrere chi nono prus de una borta a ofertas econòmicas mannas meda de sas sotziedades de su nord, abarrende pro semper in sa terra chi dd’aiat adotadu.
(gianni muroni)
Leave a comment