“Sa Regione ochiet su sardu“. Cun chimbe paràulas su Fronte Indipendentista Unidu Casteddu donat unu giudìtziu a sa polìtica linguìstica de Francesco Pigliaru. Su giudìtziu est grae.
Contra a is istantziamentos linguìsticos de sa finantziària regionale, chi sunt petzi su 0,025% de su bilantzu, su Fronte Indipendentista Unidu Casteddu faeddat de su disacatu de sa polìtica linguìstica. Sa Regione est ochiende unu traballu de 10 annos: su traballu fatu pro torrare a dare dignidade a su sardu, su traballu fatu pro fàghere de su sardu una limba normale, est a nàrrere su traballu fatu cun is mèdios, is ufìtzios linguìsticos e mescamente su traballu fatu cun is iscolas.
Ma no est acabadu inoghe. Comente Fronte Indipendentista Unidu Casteddu naramus chi nono puru a su decretu n. 2/2015 de s’Assessora a s’Istrutzione Pùblica, Benes Culturales, Informatzione, Ispetàculu e Isport de sa Regione Sardigna Claudia Firino, unu decretu chi faeddat de s’organizatzione noa de sa Diretzione Generale de s’assessoradu e de unu servìtziu de sa limba sarda chi no at a èssere prus autònomu, indipendente dae sas àteras fainas de s’assessoradu. Custu est unu signale grave e significativu, pro ite sa chistione de sa limba est e depet èssere tzentrale pro sa Natzione nostra.
Fronte Indipendentista Unidu Casteddu
Leave a comment