Freemmos, contra a s'ispopolamentu.

Freemmos, contra a s'ispopolamentu.

Ddo’at biddas in Sardigna chi sunt acanta de abarrare bòidas. S’ispopolamentu est forsis in custu momentu istòricu su prus problema mannu de s’Ìsula, chi pertocat massimamente sos logos prus piticos.

Pro su de bator annos a fila a pare sa Fondazione Maria Carta, presièdida dae su tataresu Nardo Marras, chircat de sensibilizare sa gente e sa classe polìtica subra de custu tema. 

S’initziativa pensada dae Marras est Freemmos, giogu de paràulas intre s’inglesu e su sardu chi diat cheret nàrrere lìberos de abarrare in ue semus nàschidos. Libertade chi tropu sardos non si podent permìtere.

Mùsica, cultura e sotziopolìtica sunt sos ingredientes de custa idea.

Ocannu, a pustis de àere bisitadu a Monteleone e a Domusnovas, sa manifestatzione faghet tapa in Biddeputzi. S’apuntamentu est domìniga 9 de austu.

Ant a èssere presentes sos artistas chi ant aderidu a su progetu de sa Fondazione: Maria Giovanna Cherchi, Fantafolk, Cordas et Cannas, Beppe Dettori e Raoul Moretti, I Tressardi.

Est prevista puru sa partetzipatzione de Alessia Desogus, chi dae annos istat in Ispagna, acumpangiada dae su violinu de Peppino Anfossi.

In sa bidda de su Sàrrabus Freemmos s’at a unire cun ateruna manifestatzione, sa de trèighi editziones de su Festival de sas launeddas. Parlano le launeddas est s’islogan seberadu pro custa die.

A prus de sos artistas mentuados in antis s’ant a esibire sonadores de s’istrumentu traditzionale.

S’acàpiu de sas duas manifestatzione at rapresentadu s’ocasione pro intregare su prèmiu Launeddas 2020 pròpiu a su presidente de sa Fondazione Maria Carta, Nardo Marras. In sa motivatzione si sutalìniat su caràtere identitàriu de sas launeddas; caràtere identitàriu chi est parte costitutiva de sas initziativas de sa Fondazione.

Su sìndigu Sandro Porcu e su vitzesìndigu Denise Piras ant dadu a indonu a Marras unas cantas launeddas, fatas dae su maistru biddeputzesu Giancarlo Seu.

Sa manifestatzione cheret èssere finas un’ocasione pro torrare de a beru a cumintzu cun sa mùsica in pratza, a pustis de sas proibitziones guvernativas motivadas dae resones sanitàrias.

Dae sas 19,00 a sas 22,30 est prevista sa direta televisiva a incuru de s’emitente Videolina, cun sa presentatzione de Giacomo Serreli e de Luca Gentile.

(gianni muroni)

Leave a comment

Send a Comment

S'indiritzu email tuo no at a èssere publicadu. Is campos pedidos sunt signados *