– de Salvatore Serra –
Polìtica linguìstica cheret nàrrere finas a fàghere giornales in sardu, pro afortire sa capatzidade de custa limba de operare cun unu registru artu.
Non podimus fàghere a mancu, duncas, de faeddare de sa revista “Eja”, publicada pro unos cantos annos dae sa sotziedade editoriale “Papiros”.
In custu chi est su nùmeru 11 de su 2012, b’at, in mesu de s’àteru, artìculos chi faeddant de su sardex, de sas iscòrias, de sos raportos intre sas LSC e sos dialetos, de sa figura de Giuanne Batista Tuveri, de s’autodeterminatzione de sos pòpulos in su coro de s’Europa. E b’at un’intervista fata dae Diegu Corràine a Fredo Valla, intelletuale e ativista de sa limba otzitana in Itàlia.
S’ otzitanu, connotu finas comente “lenga d’òc”, est una limba romànica chi la faeddant in sa Frantza meridionale, in Monaco, in sas Baddes otzitanas de Itàlia e in sa Val d’Aran de Catalugna; a totu custos tretos postos in pare lis narant Otzitània. S’otzitanu lu faeddant finas in s’Itàlia meridionale (Calàbria) in s’enclave linguìstica de su de Cosenza (mescamente Guardia Piemontese).
Fredo Valla, giornalista, regista e iscenegiadore, est nàschidu in Sampeyre, in provìntzia de Cuneo s’’11 de martzu de su 1948. S’est formadu con “Ipotesi Cinema”, ghiada dae Ermanno Olmi. Est istadu autore de documentàrios premiados in unos cantos festival e trasmìtidos dae sas sedes regionales de sa RAI. Pro Sat 2000, emitente de sa Conferenza episcopale italiana, at ghiadu unos cantos programmas ideados e produidos dae su regista Pupi Avati, in mesu de custos “A est di dove?”, “Il Welfare in Europa”, “Un vescovo, una città”, “I luoghi della devozione popolare in Italia”, “Le feste storiche in Italia”. At ideadu e realizadu installatziones vìdeu pro su “Museo delle Alpi” de Bard (Badde de Aosta) e pro sos museos de Elva e Bellino (Baddes otzitanas). At iscritu e coiscenegiadu sa pellìcula “Il vento fa il suo giro”, regia de Giorgio Diritti. At leadu parte e bintu prèmios in sa “Rassegna del Documentario Premio Libero Bizzarri” de San Benedetto del Tronto (1997), in su “ Filmfestival del Cinema di Montagna” de Trento (1998 – 2002), in su “Filmfestival Lessinia” (1998 – 2004), in su “Festival Cinema & Vino” (2001), in Malescorto (2006), in su “Valsusafilmfest” (2007), in “Riace Filmfestival” (2009)
Inoghe, unos cantos passos de s’ intervista.
________
- S’èsitu tuo prus mannu in custos ùrtimos annos?
S’èsitu prus mannu chi apo tentu est istadu, de seguru, su de àere partetzipadu, in su 2005, comente autore de su sugetu e comente iscenegiadore, a su longumetràgiu “Il vento fa il suo giro”, un’òpera chi de seguru at rapresentadu una novidade in su panorama de su tzìnema italianu. Est istadu, difatis, unu film autoproduidu, realizadu sena dinare agiomai, cosa frecuente meda in su tzìnema, ma non meda in sos longumetràgios. Custa pellìcula est istada finas importante ca pro sa prima bia sa limba otzitana est istada impreada in su tzìnema in manera sistemàtica. “Il vento fa il suo giro” (“E l’aura fai son vir”, in otzitanu) est retzitadu in frantzesu, otzitanu e italianu, ma mescamente in otzitanu
- Comente ses arribbadu a èssere regista e iscenegiadore. In antis, ite “vidas” as tentu?
Giai est a beru chi apo tentu “vidas” diferentes. Apo incumintzadu comente istudente de geologia, a pustis sa militàntzia otzitanista in favore de sa natzione e de sa limba mi nch’ant istesiadu dae sos istùdios universitàrios. Una die apo detzìdidu chi fiat prus importante meda a traballare pro s’Otzitània. In cussos annos, difatis, isperaiamus de realizare a’autonomia de sas baddes otzitanas in pagu tempus…
Leave a comment