– de Salvatore Serra –
In su 2001 su Presidente emèritu de sa Repùblica Italiana, Frantziscu Cossiga, aiat bogadu a campu unu progetu polìticu nou. L’aiat fatu su 7 de nadale de cussu annu in Tzaramonte, sa bidda de sa famìlia sua, in s’ocasione chi l’aiant dadu sa tzitadinàntzia onorària.
Issu aiat faeddadu de fundare unu Movimentu Federalìsticu Sardu, sighende su modellu de sa Catalugna. In particulare, aiat fatu referimentu a Convergència i Unió (CiU) una federatzione formada dae “Convergència Democràtica de Catalunya” (de tzentru dereta) e “Unió Democràtica de Catalunya” (de ideologia catòlica democristiana) chi at guvernadu sa Catalugna dae su 1980 a su 2003 e dae su 2010 a su 2015.
De custu nd’aiant faeddadu in su primu nùmeru de sa revista “Sardinna, cultura e identidade”, essidu a cumintzos de su 2002. A custu nùmeru aiant collaboradu intelletuales medas de s’area natzionalitària. S’interventu de Cossiga s’aiat leadu sa bellesa de sete pàginas.
Ite b’at abbarradu de cussu progetu? Nudda. Antzis, si podet nàrrere chi no est mancu nàschidu.
Est de interessu mannu, però, su chi aiat iscritu su Presidente in contu de limba sarda. Custu est su testu:
“Tutelamus e valorizamus limbas e faeddos, ma sa limba sarda cumbenit chi siat una: cudda antiga e famada chi isteit comune a totu sa Sardigna. Naturalmente, comente ‘isteit fattu pro su bascu ei su catalanu, la devimus finas attualizzare – ispressia pro cantu attenit a sas esigenzias noas de su lessicu, e a totu su chi bi cheret proite custa limba torret a s’attualidade cun d’un’usu fittivu e reale, non solu uffiziale , ma finas de sa zente comune – edducas a sos fines de un’issinzu pubblicu, e coment’e cattolicu mi do bonas uras, pro esser impitada in sa liturgia de sa Cheja cattolica romana nostra”
Unidade de sa limba sarda, tando. Chi est s’ùnicu caminu de sighire cando b’at unu disinnu polìticu natzionalitàriu. Chi siat de dereta, de tzentru o de manca.
Leave a comment