– de Cristiano Sabino –
Duamìgia mastros sardos subra a batormìgia chi nde teniant deretu ant naradu chi nono a sa dimanda de su “piano straordinario di immissioni in ruolo” cherfida dae su governu Renzi. Proite? Ca gente meda tenet fìgios minores, at firmadu pro comporare domo e timet de si nche andare a fora dae sa Sardigna pro fàghere su traballu suo. Sa dimanda est acabada su 14 de austu e sa Sardigna est sa regione in ue bi sunt prus pagas dimandas in cunforma a su restu de s’istadu italianu.
A pagas dies dae su batòrdighi s’assessora Firino at cramadu a sa gherra contra a sa Riforma, dimandende a sa ministra Giannini una “sospensiva” de su tèrmine e minetzende de “impugnare” sa riforma ca est incostitutzionale, comente sunt faghende atèras regiones. Naturalmente sa ministra non teniat tempus pro torrare respusta a sa pasionària de s’ùrtimu momentu e naturalmente sa dimanda pro sos mastros sardos est acabada comente totas sas atèras su 14 de austu a sa 14:00 de borta ‘e die. Tando Pigliaru at mutidu a su telefonu a sa ministra Giannini e dapoi at naradu chi in s’imbeniente già bi pessat s’istadu italianu a agatare sa manera pro non nos fàghere andare in su disterru. Comente sa Giannini a Pigliaru non lis at nadu, ma sicomente sunt amigos de partidu (ambos duos de su PD e amigos de Renzi), tando bisonzat a àere fiduzia ca sos amigos s’agiudant semper!
In su matessi tempus, Feliziani, su dirigente de su USR regionale, at naradu ca sas cosas sunt andende bene meda e ca sos mastros sardos non si nche depent lamentare ca isse puru traballat fora dae domo, sende chi benit dae su Lazio. Diat èssere istadu interessante a nàrrere puru cun cale salàriu isse est traballende inoghe, ma custu Feliziani non l’at naradu…
Tando, nos dimandamus, Feliziani l’at fatu pro si nche vendicare a non pònnere “cattedre in deroga” comente ant fatu totas sas atèteras regione? Proite su USR de sa Sardigna est istada s’ùnicu chi no at dimandadu “adeguamenti di organici”? Feliziani at naradu ca in Sardigna no sunt naschende pitzinnos, ma su Molise at cherfidu e otenidu 23 “cattedre in deroga” fintzas si est sa regione in ue naschent prus pagos pitzinnos in totu s’istadu.
Est craru ca custas fainas de sos dirigentes polìticos e de su USR sunt ridìculas e ipòcritas, ca sunt totus de acordu e faghent su traballu issoro: costu de funtzionàrios de s’istadu tzentrale e non de dirigentes pro su bene de su pòpulu sardu.
Ma bastat a si nche lamentare, passamus a sas propostas! Bisongiat dae como chi nos atobiemus pro iscrìere unu manifestu pro un’iscola de aberu sarda e cumintzare una campagna polìtica pro otènnere una lege de soberania in custu tretu ca est istratègicu. Sa Regione sarda depet otènnere su matessi deretu de su Sud Tiröl e de sa Val d’Aosta: “le attribuzioni dello Stato in materia di istruzione sono esercitate dalla Provincia di Trento nell’ambito della propria competenza concorrente(decreto del Presidente della Repubblica 15 luglio 1988, n.405) “.
Custu cheret nàrrere ca amus a detzidere nois cantos mastros nos servit e pro ite non unu funtzionàriu bènnidu dae su Lazio o unu ministru chi non ischit nudda de sos bisòngios nostros.
Custu cheret nàrrere chi amus a detzìdere nois si sos mastros depent ischire a su mancu unu livellu mìnimu de limba sarda pro pòtere traballare inoghe. Si unu mastru de fora cheret traballare inoghe est benebènnidu, ma depet ischire su sardu, comente faghent in Catalugna e in Euskadi.
In sardu si narat “a pregare in Crèsia”. Tando si Pigliaru e Firinu cherent sighire a pregare s’istadu lu fetzant puru, ma sos mastros sardos, su movimentu pro su sardu limba ufitziale, sos indipendentistas, sos sindacalistas gherradores e sos indipendentistas si nche depent atobiare, agatare puntos in cumone, batire custa pelea ainnantis fintzas a la bìnchere.
Leamus in sas manos nostras s’iscola sarda e faghimula diventare sa domo de sa gherra de totu su pòpulu sardu pro sa libertade e sa soberanìa sua
Leave a comment