Fondazione Maria Carta, cunfirmadu Marras presidente

Fondazione Maria Carta, cunfirmadu Marras presidente

Su cussìgiu diretivu de sa Fondazione Maria Carta est istadu annoadu. Comente presidente, pro àteros tres annos, est istadu cunfirmadu, a proposta de su presidente onoràriu Luigi Carta, frade de sa cantadora silighesa, Nardo Marras.

Paris cun Luigi faghet parte de sa fundatzione sa sorre puru, Rina. Pro sa bidda de Sìligo sunt presentes su sìndigu Giovanni Porcheddu e sos cussigeris Tina Masia e Antonella Santona, mentras pro Tàtari ddo’est Manuela Palitta.

Sa Regione imbetzes at a èssere rapresentada dae Caterina Orecchioni e Nicolino Sanna. Battista Cualbu, presidente regionale de sa Coldiretti, est presente pro sa Càmera de Cummèrtziu de sa Sardigna setentrionale.

Cumpletant su cussìgiu sas figuras seberadas dae sos duos Ateneos sardos, chi ant a tènnere in rapresentàntzia issoro a Romina Deriu, professora de sotziologia, pro s’universidade turritana, e a Ignazio Macchiarella, professore de etnomusicologia, pro Casteddu.

E pròpiu in contu de etnomusicologia e de sa difesa de custu patrimòniu sa fundatzione tenet unu comitadu iscientìficu. Su presidente est su giornalista Giacomo Serreli e sos àteros cumponentes sunt Antonello Sanna, Ivano Conca, Palmira Santoru e Maria Grazia Murrocu.

S’ùrtima novidade pertocat sa revisione de sos contos, finas a como afidada a Delfina Pala, chi lassat s’incàrrigu a Carmen Nieddu.

Sa fundatzione si òcupat de sa valorizatzione de sa limba e de sa cultura sarda, massimamente musicale. In prus est atenta a sa situatzione econòmica de sas biddas prus piticas. A custu propòsitu Marras at ideadu s’initziativa Fremmos. Su 30 de maju ant a torrare a cumintzu sas initziativas ligadas a su progetu, cun una manifestatzione in Monteleone.

At a torrare a abèrrere, como a presse, finas su museu chi sa fundatzione at dedicadu a Maria Carta in sa bidda sua nadia.

(gianni muroni)

Leave a comment

Send a Comment

S'indiritzu email tuo no at a èssere publicadu. Is campos pedidos sunt signados *