de Angelo Canu
Dae s’artìculu-lìtera “Ogni lingua ha un suo silenzio” de Claudia Firino, publicadu oe in s’Unione Sarda, sumit s’afuscu de un’assessora in pitzu a un’arresonu dìligu che a su de sa Limba Sarda. In sas paràulas suas s’avolotu e su pensamentu de una figura istitutzionale chi galu no at torradu rispostas craras a sas pregontas fatas dae sa polìtica e dae su Movimentu Linguìsticu pro sa defensa de su sardu. Sa matessi die chi s’iscuadra de Fùbalu de su Casteddu essit in giornale cun sa publitzidade in sardu (mancares cun una gràfia improvisada), sa nova prus de importu est sa decraratzione de Firino: pro chi bi siat su reconnoschimentu, s’amparu, sa promotzione e s’avaloramentu de su sardu, tocat a tènnere UNU istandard ortogràficu!
De cosas s’Assessora nd’iscriet meda: si cunfessat de àere isetadu pro nde cumprènderet de prus e mègius, afirmat de bideret sas cuntierras intre sas ànimas de su ML, de no aeret leadu parte a posta a sa dibata acadèmica e narat fintzas chi s’identidade e s’Autonomia de sa Sardigna non podet fàghere a mancu de su sardu. Ma sa parte chi s’Assessora sutalìniat de prus est chi su chi afortit de prus s’identidade e su chi nos distinghet dae sos àteros pòpulos est pròpiu sa limba sarda, “anche attraverso uno standard ortografico che ne agevoli l’uso e la diffusione, nel rispetto delle varianti parlate”.
Pro sa prima borta s’assessora s’atrivit a intrare in sa dibata de s’istandard (unu, duos, tres o treghentos barantabator?) e lu faghet in una manera chi paret crara, faeddende de UNU istandard ortogràficu: UNA grafia chi siat bandera pro TOTUS sos sardos.
Firino paret duncas chi intret in sa dibata a manera forte, ischende bene de andaret gasi contras a sos cumpàngios suos de coalitzione chi punnant a partzire su sardu cun duos istandard. Est gasi de a beru o est petzi un’interpretatzione giornalìstica? Ite nd’at a pensare Paolo Zedda de custa essida?
foto leada dae sa retza
Leave a comment