Firino proat a sostituire a Coròngiu

Claudia Firino est proende a chircare unu diretore nou de sa limba. Carchi die a como, su 24 de làmpadas, at firmadu una lìtera (prot. 1013/gab) in sa cale si pedit a sos dirigentes regionales de ruolu de acrarire si sunt interessados a leare s’incàrrigu.

Si chircat, a calicuna manera de sostituire a Pepe Coròngiu, diretore ‘animadore’ de su servìtziu Limba Sarda dae sa nàschida sua e lassadu essire dae sa Regione su 16 de maju coladu pro unu problema giurìdicu ligadu a su status de ‘cumandadu’ dae un’ente locale.

Sa lìtera l’ant imbiada a totu sas diretziones regionales e a totu sos dirigentes de ruolu de sa Regione a manera chi totu sos chi tenent deretu de espressare s’intentzione issoro de ocupare cussa càrriga lu fatzant. Como, sos interessados intro sos belle 160 dirigentes de su ruolu regionale, ant deghe dies de tempus pro comunicare sa disponibilidade issoro a fàghere sos diretores de sa limba.

Ma pro ite Claudia Firino non faghet unu cuncursu pùblicu comente ant pedidu in medas critichende su fatu chi Pepe Corongiu fiat diretore dae su 2006 a su 2014 sena mai àere fatu mancu una seletzione? Ca su postu chi aiat Coròngiu non fiat nen iscientìficu, nen culturale, nen polìticu. Fiat e est una funtzione de diretore amministrativu pro s’aposentare in sa cale tocat a èssere dirigentes de ruolu de s’amministratzione regionale.

Corongiu lu faghiat de cumandadu dae una comuna, ma cussa lege chi lu cunsentiat l’ant burrada. E como est impossìbile a dare custu incàrrigu a unu esternu. A s’in capas, sa Regione Sardigna est s’ùnica in Itàlia chi bantat una legislatzione de custa creze chi proibit cumandos e mobilidade de sos dirigentes pro amparare sos suos. Sos ùnicos chi podent sighire a traballare sena cumpetitzione e cuncurrèntzia nointames sas diretivas contràrias de Renzi.

Naramus chi Coròngiu, in custos annos, at isfrutadu su fatu chi fiat dirigente P.a. pro dare una ghetada de manu a sa polìtica linguìstica chi si nono diat èssere galu comente est como tzarra ebbia.

Duncas unu simple buròcrate regionale at a proare a si pònnere in logu de Coròngiu e lu depet fàghere in presse. Si iscadint sos tèrmines de lege, posca, s’assessore perdet sa possibilidade de nòmina chi colat a su Presidente de sa Regione.

Pro Claudia Firino b’est s’urgèntzia tando de serrare sa chistione finas ca su ritardu e su mudìmene in contu de polìtica linguìstica comintzat a èssere bene a craru. Non b’at peruna possibilidade, pro como, de pònnere mente a sos ‘arregulistas’ Eduardo Blasco e Paolo Zedda, chi cheriant una gestione ‘collettiva’ de su servìtziu cun una cummissione.

Pro su diretore nou no at a essere fàtzile a leare s’incàrrigu de unu personàgiu atzudu e ‘iscòmodu’ che a Coròngiu como chi s’ambiente est torra prenu de brigas e cuntierras che a cando fia intradu su diretore betzu. A pustis de unos cantos annos galanos de operatividade.