Sa Festa de sa Limba Ufitziale 2015 est istada una resessida manna. Sa manifestatzione aprontada sàbadu e domìniga colados in Òschiri at lòmpidu totu sos obietivos chi sos organizadores de su Coordinamentu pro su sardu ufitziale si ch’aiant dadu.
Partetzipatzione, calidade de su dibàtidu, democratzia in sos interventos, crèschida culturale, momentos finas de ispàssiu e recreu. Sa sala de sa Fundatzione Sanna, in sas duas dies de traballos, at bidu deghinas de interventos de istudiosos, militantes, ativistas, polìticos e esponentes de su CSU cun un’impreu bassu meda de sa limba italiana.
Intre sos momentos prus bellos e fungudos de sa manifestatzione si podent sinnalare sa relata de su catalanu Joan Adell a su pèsperu de sas eletziones, s’interventu musicale de Carla Denule, sa chistione de sa denùntzia CSU a su Cussìgiu de s’Europa de Giuseppe Pepe Coròngiu, sa testimonia de Rita Pittalis pro ‘liberare sa Sardigna tzeraca’, s’interventu in sardu de su cussigeri regionale Christian Solinas e s’arresonu polìticu (de livellu) de su lider de Unidos Mauro Pili.
Sa resessida est istada finas sa cunfirma pro Roberto Carta, animadore de su CSU, chi est resessidu a fàghere de sa bidda sua sa capitale de sa limba sarda nessi pro duas dies. Bellas finas sas relatas de Giuseppe Corronca e de Manuela Ennas. Galana sa ghia de sa presidèntzia sa segunda die fata dae Sarvadore Serra e Paolo Mugoni.
In sas dies imbenientes s’ant a fàghere analizos prus fungudos e crònacas prus pretzisas. Pro como si balet unu messàgiu craru craru chi su CSU at fatu a connòschere: nemos in su mundu depressu de unu movimentu linguìsticu (chi est malaidu de sa Sìndrome de Istocolma) est a tretu de pòdere elaborare atziones de cumpetèntzia de livellu gasi artu mobilitende totu custa gente.
CSU est creschende e cun issu creschet sa calidade de su Movimentu Linguìsticu.
Leave a comment