Sa festa manna de Portu Turres, dedicada a sos màrtires turritanos at a èssere, che a semper, sa die de Pasca de Frores, chi ocannu dd’ant a afestare su 19 de maju.
Sas tzelebratziones ant a andare a in antis pro tres dies, dae su 18 a su 20 e in prus ddo’at a àere festa finas s’8 de làmpadas.
Sas dies ddas at comunicadas sa Comuna chi at aprovadu una deliberatzione de giunta.
A prus de sa parte religiosa sunt previstos eventos de caràtere culturale e musicale
Su tantu postu dae s’amministratzione est de belle chentuchimbanta mìgia èuros, incruidu unu cuntributu de chimbanta mìgia èuros de sa Fondazione di Sardegna e de bintitrès mìgia èuros de s’assessoradu regionale a su Turismu.
Si cumintzat sàbadu 18 a sas deghe e mesu de mangianu cando ant a fàghere sa Regata del Pescatore in su Scoglio Lungo. A su sero, dae sas chimbe a sas sete, sa Biblioteca Comunale paris cun sa cooperativa COMES ant a organizare unu laboratòriu pro pipios in pratza Umberto. In fines, pro serrare sa primu die de festa, a sas noe e mesu in sa turre aragonesa est in programma su cuntzertu de Noemi.
Domìniga 19, a sas chimbe de sero in Balai a curtzu tocat a s’isfilada istòrica intitulada Il sogno di Comita. A sas ses ddo’est sa missa e a coa, a sas sete, sa professone finas a Santu Gaine. A sas noe e mesu in sas cumbessias de Santu Gaine su sòtziu Intragnas proponet sa manifestatzione folk in nome di Gavino. Sunt previstos finas cantos a chiterra.
Lunis 20 a sas 10,30 ddo’est sa missa in Santu Gaine. A coa, dae mesudie e finas a sas noe e mesu de note in pratza Eroi dell’Onda ddo’est sa sagra de su pische.
S’8 de làmpadas, pro acabbare, a sas bator de sero in Via Mare ddo’est sa curta a s’aneddu mutida Palio di Santu Bainzu, manifestatzione chi fiat torrada ocannu passadu a pustis de 6 annos de assèntzia.
(gianni muroni)
Leave a comment