Si non bi las fata a bènnere, la podes castiare in tv. Sa Festa de sa Limba Ufitziale 2015 at a èssere trasmìtida intrea da Telesassari.tv giòbia chi benit 8 ladamine/santugaine H. 21 in su canale de su digitale terrestre 662 e finas in streaming a s’indiritzu
http://www.sassari.tv/frontend/tv/default.aspx
e custu cheret nàrrere, pro chie galu no l’ischit, chi dae cada punta de logu de su mundu si podet bìdere sa chi est est istada una resessida manna. Sa manifestatzione aprontada sàbadu e domìniga 26 e 27 colados in Òschiri at lòmpidu totu sos obietivos chi sos organizadores de su Coordinamentu pro su sardu ufitziale si ch’aiant dadu.
S’eventu at torradu a cunfirmare chi su Coordinamentu pro su Sardu Ufitziale est un’organizatzione emergente de su Movimentu lInguìsticu chi si candidat a s’egemonia cuncreta. B’at àteros grupos, organismos e individuos, ma nemos resesset a mobilitare sa gente comente su sòtziu fundadu in su mese de Làmpadas 2014 in Santa Justa de Aristanis.
E tando pro cumprèndere mègius su mètodu e sa fortza de custa organizatzione si podent torrare a bìvere sas dies de sa Festa de Oschiri gràtzias a Telesassari e a Giuseppe Bazzoni chi traballat de a beru comente unu servìtziu pùblicu e at fatu totu a in donu.
Ateras televisiones, chi narant chi sunt pro sa limba sarda, e ant finas su nòmene in sardu, non si sunt bidas in Oschiri. TeleSassari imbetzes emmo e at totu sa gratitudine nostra. E tando ammentade-bos custu indiritzu
http://www.sassari.tv/frontend/tv/default.aspx
GIOBIA 8 LADAMINE/SANTUGAINE H. 21.00
Partetzipatzione, calidade de su dibàtidu, democratzia in sos interventos, crèschida culturale, momentos finas de ispàssiu e recreu. Sa sala de sa Fundatzione Sanna, in sas duas dies de traballos, at bidu deghinas de interventos de istudiosos, militantes, ativistas, polìticos e esponentes de su CSU cun un’impreu bassu meda de sa limba italiana.
Intre sos momentos prus bellos e fungudos de sa manifestatzione si podent sinnalare sa relata de su catalanu Joan Adell a su pèsperu de sas eletziones, s’interventu musicale de Carla Denule, sa chistione de sa denùntzia CSU a su Cussìgiu de s’Europa de Giuseppe Pepe Coròngiu, sa testimonia de Rita Pittalis pro ‘liberare sa Sardigna tzeraca’, s’interventu in sardu de su cussigeri regionale Christian Solinas e s’arresonu polìticu (de livellu) de su lider de Unidos Mauro Pili. Sa resessida est istada finas sa cunfirma pro Roberto Carta, animadore de su CSU, chi est resessidu a fàghere de sa bidda sua sa capitale de sa limba sarda nessi pro duas dies. Bellas finas sas relatas de Giuseppe Corronca e de Manuela Ennas. Galana sa ghia de sa presidèntzia sa segunda die fata dae Sarvadore Serra e Paolo Mugoni.
CSU est creschende e cun issu creschet sa calidade de su Movimentu Linguìsticu.
http://www.sassari.tv/frontend/tv/default.aspx
Leave a comment