Custu merie, tres aplicatziones de su mundu Meta non fiant funtzionende bene. Su problema at pertocadu Facebook, Instagram e Threads: a ora de sas 16, e pro belle duas oras, sos utentes non resessiant a intrare a sos contos issoro.
Medas impreadores de Facebook ant signaladu chi sa rete sotziale de Zuckenberg los aiat disconnètidos de repente impedende·lis de torrare a intro de su profilu ca non reconnoschiat sa crae.
Pro Whatsapp, imbetzes, sos problemas pariant de entitade minore: s’aplicatzione de messagìstica fiat atzessìbile pro sa majoria de sos utentes in sos telèfonos e in sos computadores.
«Ischimus de sos problemas de atzessu a sos servìtzios nostros e bi semus traballende» aiat declaradu Andy Stone, boghe de Meta, cun unu post in sa rete sotziale X. E a pustis: «Amus risoltu su problema su prus lestru possìbile pro totu sas persones interessadas e pedimus iscusa pro eventuales disàgios».
Galu non si connoschent sas càusas de custu disservìtziu chi est de dimensione globale e chi at interessadu unu nùmeru mannu de profilos.
B’at chie faeddat de un’atacu informàticu, chie de errore umanu e chie de problemas tècnicos, ma no giuat a fàghere ipòtesis in contu de cajones de disservìtzios: tocat de isetare sos acrarimentos ufitziales.
Gianfranca Orunesu
Leave a comment