In sa note de eris giòbia 23 de martzu, est mortu Antonio Bisaccia, su diretore de s’ùnica Acadèmia de arte in Sardigna, sa Sironi de Tàtari. Bisaccia fiat un’intelletuale de gabbale, famadu in Sardigna e in fora de s’ìsula. Iscriat in su «Sole 24 Ore» e fiat sa ghia de su Cussìgiu pro s’Arta Formatzione de s’Arte e de sa Mùsica. In custa positzione aiat gherradu pro torrare a dare unu rolu a s’imparu e sa formatzione artìstica.
Sitzilianu, si fiat tramudadu in Sardigna e dae prus de trint’annos ghiaiat s’Acadèmia Sironi cun una mirada longa. Aiat torradu a impitare su giassu de su Masedu pro fàghere istudiare in paris sos istudiantes e fiat istada sua s’idea de impreare s’ochidòrgiu betzu de Tàtari comente logu pro unu “campus” dedicadu a s’arte e s’ispetàculu. Progetu chi no est galu agabbadu, ma chi cando lu at a èssere, at a dare àrchida a sa tzitade.
Cras a sas noe e mesa, b’at un’ammentu e unu saludu pùblicu intro de s’Acadèmia sua. A sas ùndighi su funerale.
(redatzione)
Leave a comment