Su raportu de sa Sardigna cun s’indùstria no est istadu mai de sos mègius, a su nessi cun cuddas nàschidas dae un’impèllida de fora. Difatis, s’idea chi at ghiadu sos amministradores no fiat de pònnere a cùrrere lìneas de produida ligadas cun sas risursas de s’ìsula, diferentes e maicantas, ma cussa de batire metèrias dae fora pro las traballare inoghe e, a pustis, las bèndere addae de su mare. Si custu podet andare bene pro Istados cun un’economia forte, in Sardigna est sa manera pro faddire.
Su pianu de Rinascita est istadu un’imbòligu chi in biddas medas at lassadu luòngiu e càssia integratzione. Sas promissas, de sos annos Setanta e Otanta, de modernidade industriale como sonant che a una brulla. A lenu a lenu s’ìsula est perdende richesa, traballu e possibilidades pro sèberos polìticos betzos, comente at naradu sa CGIL in su documentu de su primu de maju. Tres logos contant de custa crisi: Portu Turre, su Sulcis e Machiareddu.
Est de martzu sa denùntzia de Silvio Lai in su Parlamentu chi sos acordos firmados cun s’ENI de dare sos apaltos pro acontzare, sabunare e pro sa mantenidura de sos impiantos a aziendas sardas non sunt sighidos dae sa sotziedade chi, difatis, los at dados a impresas sitzilianas. Si annanghimus s’istòria prena de istorbos de sa chìmica birde, cumprendimus chi onni borta paret de torrare semper a sa matessi cuntierra.
In su Sulcis, Glencore paret fatende su giogu de s’ENI, cando duos annos a como at violadu sos patos cun sos traballadores e su guvernu serrende sa lìnia de su zingu. Sa chistione aberta de Eurallumina, chi cun sa gherra in Ucraina at pèrdidu su ligàmene cun s’azienda mama in Rùssia, est andende a dae in antis sena agatare solutzione. Ambas duas parent morende a lenu a lenu, lassende traballadores maicantos a domo o cun paga seguresa pro su benidore.
Machiareddu est bivende sa crisi de sa Bekaert, s’indùstria chi produit cavos de atàrgiu de pònnere intro de sas gommas de sas màchinas. Pro neghe de sa crisi de sas veturas, sa sotziedade at seberadu, de tancare e istesiare sa produtzione a tesu. Su guvernu e sa Regione sunt proende a abèrrere un’arresonu, ma si fintzas un’azienda chi traballaiat in Sardigna dae prus de chimbant’annos si nch’est andende, sa situatzione est grae e s’arriscu est su desertu industriale.
Gabriele Tanda
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment