S’Areus no istentat a amaniare in Fenosu unu campu pro sos elicòteros de su 118.
Su progetu torrat cun unu disinnu prus mannu chi punnat a afortire in totue sos servìtzios de sucursu pre-ospidale cun ambulàntzias e automèigas e cun sos mèdios aèreos.
Pro Fenosu ant firmadu una cunventzione su Repartu de bolos n 7 de sa Politzia de Istadu de Aristanis e sa Sogeaor, sotziedade de gestione de s’iscalu, cun sa cale si cunsacrat s’acordu pro impitare s’istrutura.
Su campu pro elicòteros l’ant a impreare pro assegurare su sucursu primàriu in su territòriu e sos traposrtos segundàrios de urgèntzia amaniados dae s’ospidale de Aristanis pro lòmpere a ospidales de ispetzialidade arta, mescamente pro patologias definidas “tempus dipendentes”, chi sa prògnosi issoro est ligada a sos tempos de acumprimentu de atzertamentos diagnòsticos e interventos terapèuticos.
Si tratat de interventos pro arrestu cardìacu, sìndrome coronàrica aguda, insufitzièntzia respiratòria aguda, ictus e tràuma majore, chi lis narant “sas chimbe de sa prima ora”, ca sa probabilidade de sarvare su malàidu est ligada a un‘interventu sanitàriu comente si tocat intro de un’ora dae cando si manifestant sos sìntomos.
(sa redatzione)
Leave a comment