Sas eletziones parlamentares de su 24 de maju rapresentant pro Tzipru unu momentu istòricu chi promitet de bortulare su duopòliu polìticu traditzionale de s’ìsula. Si su Mediterràneu osservat cun atentzione manna sas dinàmicas de istabilidade regionale, sos tzitadinos tzipriotas si preparant a unu votu marcadu dae una frammentatzione mai connota in antis, cun paritzas formatziones polìticas prontas a si cuntierrare sos chimbantases sègios de sa Càmera de sos Rapresentantes. Su coro de su disafiu eletorale no est petzi in sa partzidura istòrica de su paisu o in sas tensiones cun sa Turchia, ma in una crisi funduda de cunfiàntzia chi nch’est giughende s’eletoradu conca a lidos inèditos. Su guvernu de su Presidente Nikos Christodoulides s’agatat oe a dèvere gestire un’arrennegu chi creschet, alimentadu dae una corrutzione sistèmica e a pustis de s’iscàndalu de sos passaportos de oro chi at mantzadu s’immàgine de sa Repùblica in sos ùrtimos annos. In custu cuntestu, sos duos colossos istòricos de sa polìtica locale, sos cunservadores de su Disy e sa manca de s’Akel, sunt connoschende una mèngua de cunsensos in favore de fortzas emergentes. Comintzende dae sa dereta estrema de s’Elàm, chi punat a èssere su de tres polos natzionales capitalizende su votu de protesta. In su matessi tempus, sa figura de s’ex revisore generale Odysseas Michaelides, cun sa lista noa sua Alma, si presentat comente su chi cheret trasparèntzia in intro de una sotziedade tzivile istraca. Sa de su 24 de maju at a èssere duncas una proa de subravivèntzia pro sa coalitzione tzentrista e una proa de su fogu pro Annita Demetriou, cramada a mantènnere unidu su fronte moderadu. Sas cunsighèntzias de unu Parlamentu atomizadu diant pòdere cajonare inguvernabilidade, oblighende sas fortzas a cumpromissos difìtziles, pròpiu como chi s’Unione Europea est pedende rispostas firmas in contu de riformas econòmicas e de sa transitzione energètica in su Levante.
mauro piredda
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment