Oe diamus àere dèvidu iscrìere de sos resurtados eletorales libanesos e analizare sos echilìbrios de un’assemblea natzionale annoada, ma in Beirut s’emergèntzia permanente at fatu prus chi non bene sa parte sua. De reghente ant difatis aprovadu su rinviu de su votu a su 2028, perlonghende in manera artifitziale sa vida de una legisladura chi in medas cunsìderant giai esaurida. Sa càusa ufitziale cumbinat cun s’instabilidade bèllica in sa Blue Line e in su perìgulu chi sa cuntierra regionale potzat interessare totu su paisu, rendende tecnicamente impossìbile s’acumprimentu de su votu in seguresa. De cada manera, in dae in segus de custa motivatzione securitària si cuat sa paràlisi de unu sistema cunfessionale chi no est a tretu de elègere unu Presidente de sa Repùblica dae su 2022. Su Parlamentu atuale est unu mosàicu frammentadu ue su blocu ghiadu dae Hezbollàh e Amal mantenet su controllu istratègicu mancari sa pèrdida de sa majoria assoluta acontèssida su 2022. In su fronte opostu, sas Fortzas libanesas de Samir Geagea si cunfirmant su primu partidu cristianu, ma s’opositzione issoro est priva de sos nùmeros netzessàrios pro impònnere unu cambiamentu. In custa paule si movent sos deputados indipendentes nàschidos dae sas protestas de su 2019, oramai ischitzados intre sas lògicas de sos blocos mannos. Sas cunsighèntzias de custu rinviu sunt graes: su Lìbanu abarrat sena unu guvernu cun poderios prenos e sena sa legitimatzione democràtica netzessària pro negotziare cun su Fundu monetàriu internatzionale. Sas prospetivas cara a su 2028 aparint duncas signadas dae un’agonia istitutzionale chi arriscat de consumare galu de prus su tessutu sotziale. Sena unu ricàmbiu polìticu lestru, su paisu at a afrontare sos imbenientes duos annos in unu limbu ue s’ausèntzia de riformas istruturales e s’inflatzione galoppante ant a sighire a isboidare de significadu sas istitutziones, mentras sa polìtica sighit presonere de vetos rugrados e dinàmicas regionales.
mauro piredda
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment