Domìniga 12 de maju sos catalanos ant votadu pro su rinnovu de su parlamentu locale. At bintu su Partidu Sotzialista Catalanu, chi at cunfirmadu sa presèntzia sua istòrica massimamente in sa tzitade de Bartzellona e in sas biddas totu a inghìriu.
Sos duos partidos indipendentistas prus mannos, Junts+Carles Puigdemont per Catalunya e Esquerra Republicana de Catalunya, paris ant cunfirmadu pagu prus a mancu su tantu de votos chi teniant, tenende contu chi Junts si podet cunsiderare s’erede de su Partit Demòcrata Europeu Català, coalitzione de s’indipendentismu de tzentrudestra, ma cun una pèrdida de votos de Esquerra, movimentu de manca, in favore pròpiu de Junts.
In cunfrontu de sas ùrtimas eletziones ddo’at de signalare su resurtadu positivu de su Partidu Populare, chi est torradu a subra de su 10% e at leadu sègios a chimbe bortas de su 2021. Su partidu de destra Vox at mantènnidu su resurtadu de in antis, siat comente pertzentuale siat comente sègios.
In su campu indipendentista èsitu mannu, pro sa prima borta in parlamentu, de Aliança Catalana, chi tenet positziones de destra e chi at fatu una campagna eletorale faeddende pro su prus de su tema de s’immigratzione.
Sas eletziones de su 2021 aiant bidu sa nàschida de unu guvernu cun Esquerra, su PDECat (Partit Demòcrata Europeu Català), su partidu Sotzialista e En Comù Podem, partidu de manca, cun Pere Aragonès, esponente de Esquerra, comente presidente.
Custa borta sos sotzialistas partint dae una cunditzione prus favorèvole, giai chi ant megioradu sas pertzentuales e su candidadu issoro, Salvador Illa, paret su favoridu a leare s’incàrrigu de ghiare s’esecutivu.
Custos sos resurtados:
PSC: 27,96% e 42 sègios
Junts+: 21,61% e 35 sègios
ERC: 13,68% e 20 sègios
PP: 10,97% e 15 sègios
Vox: 7,96% e 11 sègios
Comuns Sumar: 5,82% e 6 sègios
CUP: 4,09% e 4 sègios
Aliança Catalana: 3,78% e 2 sègios
Sa majoria est de 68 sègios. S’afluèntzia a sas urnas est istada de su 57,97%.
(gianni muroni)
Leave a comment