Su 7 de maju sos tzitadinos britànnicos votant pro sos parlamentos de Iscòtzia e de Galles e pro sas eletziones locales de Inghilterra. E cussa die su Regnu Unidu si nd’at a ischidare cun un’arbèschida chi promitet de si tìnghere a birde. Unu colore inèditu chi, però, abbaidende·lu bene intre sos fumos de sas periferias e sas coas in sas firmadas de sos postales, costoit unu ruju antigu. Si unu tempus a sos birdes de su Green Party los avisaiant “tories on bike” (amparu indeoradu pro sa burghesia de sas pistas tziclàbiles indiferente a sas ingiustìtzias sotziales), oe sa mùsica paret un’àtera. Sa chi est falende peri sas carreras de Londra, de Cardiff e de Edimburgu est una “generatzione sìndria”: birde in foras ma, difatis, ruja in intro. Su partidu (in sas articulatziones suas “Green party of England and Wales” e “Scottish Greens”) at sessadu de faeddare petzi de sistemas màssimos ecològicos imbrutende·si sas manos cun sos problemas de sa vida, de sa domo e de su traballu. In pràtica sos birdes sunt un’oriolu mannu pro unu Labour incurpadu de àere pèrdidu s’ànima operaja sua. Peri sas carreras de Manchester o in sos bighinados populares de Londra, sos birdes non sunt promitende petzi pannellos solares, ma postales a un’isterlina e asilos nidu gratùitos. Est sa rivolutzione de sos trasportos e de s’edilìtzia populare chi faeddat deretu a su coro de sa working class, sa chi non lompet a concruos de mese e chi bidet in sos tzentros istòricos desertificados dae sas multinatzionales su sìmbulu de unu declinu chi durat dae tempus meda. Su pianu pro recuisire sas butegas tentas bòidas pro las torrare a sas comunidades locales tenet su nuscu de una polìtica musculare, belle de àteros tempos, chi praghet a chie s’intendet traitu dae sas promissas de su sistema. In Iscòtzia e Galles, su disafiu est galu prus radicale, cun unu programma chi aunit s’indipendentismu sotziale a sa gherra contra a sas caldajas a gas. Sos sondàgios faeddant craru e su 17% a livellu natzionale no est prus unu bisu a tesu, ma su sinnu de unu movimentu tetònicu. Su 7 de maju s’at a cumprèndere si s’unda birde s’at a ischire trasformare a beru in una marea ruja capatze de afundare s’òrdine betzu, giughende su pragmatismu de su pane e de sas rosas in intro de sos palatzos de su poderiu britànnicu.
mauro piredda
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment