Immàgine leada dae https://mota.gov.eg
Su Ministèriu de Turismu e Antichidades de Egitu at annuntziadu, su 9 de abrile coladu, un’iscoberta archeològica in Tell El-Farama, in s’ala setentrionale de su Sìnai.
A pustis de ses annos de iscavos est essidu a pìgiu unu tèmpiu. In su 2019 aiant iscavadu su 25% ebbia de su monumentu, cosa chi no aiat permìtidu a sos istudiosos de cumprèndere bene s’usu de su fràigu. Como, finida s’òpera, est craru ca su chi ant agatadu est unu logu sacru.
Su monumentu s’agatat in su giassu in ue ddoe fiat s’antiga tzitade de Pelùsiu e segundu sos archeòlogos dd’ant usadu dae su de duos sèculos a.C a su de ses sèculos p.C. Su diàmetru de su tèmpiu est de unos 35 metros. A intro de su fràigu ddoe passaiat abba càrriga de limu de su Nilu. In mesu sunt abarrados sos restos de sa base cuadrada de sa chi diat dèpere èssere istada s’istàtua de su deus chi su logu est dedicadu, Pelùsiu.
Su nùmene de custa divinidade, e de sa tzitade antiga, benit dae su gregu pelòs, est a nàrrere ludu. Est possìbile chi su nùmene siat una tradutzione literale de cuddu egìtziu, sajnew, in ebràicu sain, chi su significadu diat pòdere èssere, cunforma a carchi interpretatzione, terra logiana. Custu fatu diat èssere ateruna cunfirma de s’importàntzia chi su Nilu, chi allogianaiat sos campos, at semper tentu in s’economia de su paisu, massimamente in sos tempos prus antigos.
S’adatamentu in gregu de unu nùmene egìtziu tenet unu riflessu finas in sa forma de su tèmpiu. Difatis su situ tenet elementos de sa traditzione architetònica egìtzia ammisturados però cun elementos ellenìsticos e finas romanos, sas tres culturas chi pro carchi sèculu ant bìvidu paris in cudda ala de su mundu.
Su situ s’agatat in sa chi est connota, cun unu nùmene latinu, comente Via Maris, su caminu chi andaiat dae Menfi a Damascu, chi sos giudeos ddi naraiant Caminu de sos Filisteos, ca nche passaiat in sas terras, sa Gaza de oe, colonizadas dae cuddu pòpulu.
(gianni muroni)
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment