Su Festival musicale Abbabula torrat ocannu puru pro sa de 23 editziones. Dae su 28 a su 30 de trìulas e dae su 2 a su 3 de austu ùndighi artistas s’ant a esibire in Tàtari, in pratza Moretti.
Ant a èssere rapresentados mundos musicales diferentes, dae sa mùsica africana a sa mùsica cantautorale italiana, a su rap.
A prus de nùmenes connotos che a Samuele Bersani e Peppe Servillo, boghe istòrica de sos Avion Travel, ant a fàghere intèndere sa boghe issoro artistas sardos puru.
Aberit sa manifestatzione Samuele Bersani cun s’ispetàculu Cinema Samuele Tour.
Su 29 cantant sa brasiliana Carol Mello e s’ivoriana Fatoumata Diawara.
Su 30 imbetzes tocat a Arianna Del Ghiaccio, alias Ariete. Sa cantadora latziale at a èssere introduida dae sas esibitzione de artistas tataresos, est a nàrrere de Bandito, nùmene de arte de Antonio Meleddu, Claudia Canu e sos La Plonge, grupu formadu dae Domenico Canu, boghe e chiterra, Felice Canu, bassu e Massimiliano Lai a sa bateria.
Su 2 de austu ispàtziu a Salvatore Canneddu, in arte Astro, musitzista rap tataresu premiadu in Torinu in su cuncursu literàriu InediTO in sa setzione testu cantzone. In prus sunt in programma sas esibitziones de Chiara Floris, cun su progetu Bluem e de Mario Serra, in arte Low-Red.
S’ùrtimu sero, su 3 de austu, serrant su Festival sos Uomini in Frac, chi proponent un’omenàgiu musicale in versione jazz a Domenico Modugno. Su grupu est cumpostu dae Peppe Servillo, boghe, Javier Girotto, sax, Fabrizio Bosso, trumba, Rita Marcotulli, pianoforte, Furio Di Castri, contrabbassu e Mattia Barbieri, bateria.
Abbabula est organizadu, che a semper dae Le Ragazze Terribili, chi curant s’editzione artìstica de sa manifestatzione dae sa prima editzione, in su 1996. Sos billetes si podent comporare finas in prebèndida a unu prètziu prus bassu.
(gianni muroni)