Sa Comuna de Tèmpiu, paris cun s’AES e sa biblioteca comunale, cun su patrotzìniu de s’assessoradu regionale a sa Cultura organizat Il futuro prossimo. S’initziativa faghet parte de su tzircùitu L’isola dei libri.
Sa manifestatzione est insertada in sa segunda editzione de Qui c’è aria di cultura, s’eventu de promotzione de s’editoria sarda, chi est in programma in direta streaming, semper a sas ses de sero, finas a su 3 de martzu.
Sas diferentes setziones sunt dedicadas finas a fumetos, audiolibros e libros eletrònicos. Atualidade, literadura, fotografia e istòria ant a èssere sos temas tratados.
Su 29 de ghennàrgiu sa presidente de s’AES Simonetta Castia at abertu sa manifestatzione, paris cun s’assessore a sa Cultura de Tèmpiu Monica Liguori.
Castia at faeddadu de sa fòrmula noa de custa mustra de su libru e, intre sas àteras cosas, at sutaliniadu s’importàntzia de sas iscolas a intro de sa filiera librària; iscolas chi sunt adotende formados noos che a sos libros a arta legibilidade pensados massimamente pro sos pitzocheddos malàidos.
Liguori, in càrriga dae santandria, at dadu sos saludos de su sìndigu e at ammentadu s’agiudu de sa tecnologia chi est permitende sa realizatzione de sa manifestatzione chi si nono non fiat istadu possìbile a pònnere in caminu in custos tempos de proibitziones.
A pustis ddo’at àpidu sa presentatzione de su progetu Janas s’incantu, pro Janas Lab/Alfa Editrice, de Simona Barlini, chi nd’at faeddadu cun Maria Marongiu.
Sa die in fatu Lidia Fancello at presentadu Il brevetto scomparso cun Marianna Bulciolu e cun Dario Maiore, pro Taphros. S’òpera at rapresantadu s’esòrdiu de s’editoe gadduresu in e-book. Neghe de unu problema tècnicu sa presentatzione est sighida su 31.
Oe 3 de freàrgiu est in programma Osserva le distanze/Esercita il pensiero, presentadu dae Ilisso paris cun AIAP, Associazione Italiana Design della Comunicazione Visiva.
Su 5 semper sa Ilisso presentat Marianne Sin Pfältzer. Paesaggi Umani, dedicadu a sa fotografa tedesca chi at ligadu s’atividade sua a sa Sardigna.
Su 7 tocat a Mediando cun s’audiolibru Storia di un gatto, de Enrico Costa, cun sa boghe de Paolo Poli.
Su 10 e su 12 de freàrgiu Arkadia Editore presentat sa primu die a sos autores Follesa e De Maria chi faeddant paris cun Vincenzo Soddu de Fashion victimis e sa segunda a Mauro Tuzzolino chi paris cun Bruno Murgia faeddat de I giovani e il covid.
Pro Condaghes su 17 Claudia Aloisi paris cun Eleonora Carta presentat Flavia’s end.
Su 19 tocat galu a Ilisso cun sas lìteras de Salvatore Satta a Laura Boschian, Mia indissolubile compagna, lèghidas dae Giovanni Carroni.
Su 24 NOR proponet La monetazione nella Sardegna nuragica: ipotesi e ricerche, de Alessandro Atzeni, chi nde faeddat cun Andrea Garau.
Su 26 Sandro Dessì cun Dario Maiore presentat pro Delfino Antonio Gramsci e Emilio Lussu.
S’ùrtima die de su mese est dedicada a sos fumetos: Domenico Distilo e Bepi Vigna presentant pro Arkadia Manga Do, Igort e la via del Manga.
Arkadia etotu serrat, su 3 de martzu, sos apuntamentos de custa mustra virtuale de su libru cun Sulla collina de Giampaolo Cassitta, paris cun Francesco De Filippi.
Sas diretas sunt in sa pàgina facebook de s’AES.
(gianni muroni)
Leave a comment