E abà lu sassaresu standard

E abà lu sassaresu standard

“Mancu mari” o “mancu mali”? Luego sa risposta, ca finamentas “lu sassaresu” l’amus a pòdere iscrìere a norma. Est su chi leghimus in su situ internet ufitziale de su Comune chi annùntziat custu passàgiu istòricu de importu a sèighi annos dae s’aprovu de sas règulas de sa Limba sarda comuna. Su progetu est afidadu a s’Istitutu Bellieni chi intro de su mese de santugaine de ocannu nos at a dèvere presentare sos liniamentos grammaticales de cussa minoria linguìstica faeddada in Tàtari, Portu Turre, Sossu e Istintinu. In su grupu de traballu b’ant a èssere Mario Lucio Marras (ispetzialista de su turritanu), Michele Pinna (supervisione de sas atividades progetuales), Maria Doloretta Lai (organizadora culturale) e Maurizio Virdis (linguista). Su grupu at a mòvere dae su connotu “di la linga”: sos iscritos de Pompeo Calvia, Salvator Ruiu, Cesarino Mastino e Gildo Motroni; sos vocabulàrios de Giosuè Muzzo, Giampaolo Bazzoni e Vito Lanza; sas grammàticas che a sa de Bazzoni e sa regorta de ditzos “Pà modu di dì”. A su chi narat Pinna b’amus a àere «unu repertòriu grafemàticu dèghidu pro rapresentare sos sonos distintivos de sa limba» e «règulas de pronùntzia». S’impiantu, nânt chi, at a èssere «ispiradu a sas lògicas linguìsticas modernas». Sa lògica e sas metodologias de sa Lsc ant a èssere unu «puntu de riferimentu» pro su fràigu de su tataresu istandard. S’initziativa nch’est in intro de su progetu regionale prus mannu de istandardizatzione de sas minorias chi pertocat finamentas su gadduresu e su tabarchinu.

màuru piredda

Leave a comment

Send a Comment

S'indiritzu email tuo no at a èssere publicadu.