Los sunt chirchende a pedras furriadas sos bandidos chi, custu mangianu, a ora de sas 10, ant irrobadu sa filiale de su Crèditu Cooperativu de Arborea, in Donigala Fenughedu, una fratzione de Aristanis.
3 bandidos caratzados, unu armadu de pistola, sunt intrados a sa banca, minetzende sos impiegados e faghende·si cunsignare su dinare de sas cassas. Una borta leadu su dinare, belle 1.000 èuros, si nche sunt fuidos cun una vetura ue los fiat isetende unu còmplitze.
In pessu dadu s’allarme, a su logu sunt supridos sos Carabineris de su Cumandu provintziale de Aristanis chi ant aviadu sas indàgines. Sa filiale de sa banca l’aiant giai irrobada un’annu faghet e ant peri arrestadu sos bandidos.
Mariantonietta Piga