Domus de janas in Parigi

Unu traballu cuadu ma de importu mannu est andadu a dae in antis in custos annos, su de su Centro studi identità e memoria, Cesim, de Tàtari (inoghe) pro mìntere sa preistòria sarda in su Patrimòniu Mundiale de s’UNESCO. Como su progetu at betadu passu, unu de importu mannu: su segretàriu generale de su Mibact at aprovadu sa rechesta e at imbiadu sos documentos a Parigi in ue s’UNESCO at a analizare sa proposta.

Su disinnu de su Cesim est de pònnere in su Patrimòniu de s’Umanidade s’arte de sa preistòria sarda in sas espressadas prus artas chi at àpidu. Totus monumentos fraigados tempus a in antis de sos nuraghes e chi tenimus petzi nois in su Mediterràneu. Unu progetu chi est tzucadu in su 2017 pro more de unu grupu de istudiosos de primore, ghiados dae Giuseppa Tanda, e chi a bellu a bellu at agatadu su sustegnu de sos entes locales e de sa polìtica.

In sa pedida a S’UNESCO b’at trintaghimbe giassos e sa majoria sunt domus de janas. B’at cussas pintadas e isculpidas e fintzas sas necròpolis prus mannas, comente Ànghelu Ruju de s’Alighera. In paris cun custas b’at àteros giassos, totus impreados dae sos archeòlogos pro cumprèndere cale fiat sa bida in s’antigòriu prus a tesu chi amus. In sa lista b’at Monte d’Accoddi in Tàtari, Li Muri de Alzachena, Serra Linta de Sèdilo, Pranu Muteddu de Goni, Su Dolmen de sa Covecada in Mores, Monte Baranta de Ulumedu, Sas ofitzinas lìticas de Sennisceddu in Pau, sa gruta Corbeddu in Ulìana e s’amparu de Luzanas de Otieri (inoghe sas resones e s’elencu intreu).

Calicunu de custos giassos est pagu connotu e pagu contivigiadu, ma cada unu tenet un’importu mannu de a beru pro s’istòria sarda: sos primos artistas sardos ant lassadu sas òperas issoro inoghe, inoghe biviant e traballaiant, moriant e proaiant a barigare su tempus cun su traballu de sas manos issoro. Bènnidu est su tempus de batire custa erèntzia in totu su mundu.

(redatzione)