Su disinnu l’ant pigadu. Sos de sa Corte federale australiana ant naradu chi nono a su recursu de Novak Djokovic contra a su guvernu Morrison chi pro duas bias si fiat opostu a s’intrada de su tennista serbu no vax. Chistiones de salude pùblica ant duncas impedidu a su nùmeru unu de su tennis mundiale de pòdere pigare parte a sos Australian Open. Serrada, duncas, una chistione chi fìamus bantzighende·nos·la dae carchi chida. Ma chie la binchet sa partida? Cale visione de sotziedade nde essit a campu dae sas allegas? A dereta teniant dudas intre sa libertade de movimentu de unu ricu e sa cultura de sas làcanas. Ma est in intro de sa manca matessi chi b’at àpidu unu “scappellamento a destra” cun s’artziada in triunfu de s’individualismu de unu ricu che a Djokovic e, a s’imbesse contra a isse, cun s’endorsement a unu guvernu chi tenet su “ministru de s’immigratzione”. Game, set, match. Djokovic at pèrdidu, ma ant bìnchidu sos che a issu.
màuru piredda
Leave a comment