Su fine chida coladu unu terremotu at corfadu su Maroco e at isciusciadu bidda maicantas, ochiende belle e tres mìgia persones. Sa zona in ue est acontèssida sa tragèdia est cussa a subra de sos montes Atlante. Sa tzitade prus de importu chi at contadu dannos est Marrakech, chi però in pagu tempus est torrada a una genia de normalidade. Su guvernu difatis s’est isfortzadu de prus in ie pro non pèrdere sos turistas. Su problema prus mannu est in sas biddas de intro chi sunt abarradas assoladas dae su restu de su Paisu: dae in ie non benint novas medas e nemmancu sos sucursos renessent a lòmpere pro dare agiudu a sa populatzione. Pro custa resone sa timoria est chi sas vìtimas potzant crèschere meda meda.
Sa situatzione s’intritzat finamentas a sa polìtica. Su re de Maroco, difatis, non cheret fàghere intrare sos agiudos de carchi Istadu istràngiu. At atzetadu petzi sos dae Ispagna, Rennu Aunidu, Emirados àrabos aunidos e Qatar. A sos àteros at proibidu s’intrada pro istesiare arriscos de interferèntzia e de incùngia de informatziones riservadas. Su problema est chi sa situatzione est grae meda e custos sèberos la podent peorare.
Pagu tempus a pustis, su note intre domìniga e lunis, unu disàriu at corfadu Derna in Lìbia, o mègius in Tzirenàica. Dae sas testimonias paret chi unu cuartu de sa tzitade est istadu betadu a terra dae su riu chi est essidu dae sos àrgines. Unu disacatu mannu mescamente ca corfat una Paisu partzidu dae una gherra muda pro s’Otzidente, e cun un’Istadu chi non bi est de a beru e chi non renesset a ammanigiare agiudos e sucursos cun àsiu. Mancu a lu nàrrere, sos mortos ant a èssere maicantos, a dolu mannu.
(redatzione)
Leave a comment