Sa Giunta Regionale at aprovadu sos critèrios pro assignare 100 mìgia èuros de contributos a sas ràdios locales pro sa promotzione de sa cultura e de sa limba sarda.
Sas resursas, in cunforma a sa delìbera proposta dae s’Assessore de sa Cultura Claudia Firino, ant a èssere derramadas intro sas emitentes chi ant a trasmìtere notitziàrios e programmas pro valorizare “cultura e limbas sarda”.
“ In sa fase de tramudu dae s’analògicu a su digitale – at cunsideradu s’assessora – su contributu regionale rapresentat una forma de agiudu a sa radiodifusione locale e un’impellida a s’innovatzione tecnològica de su setore, in su surcu de sa valorizatzione de sas traditziones”.
Sos contributos ant èssere dados in mesura non prus manna de su 80 % de su gastu totale de sa programmatzione pro nessi 36 meses, proposta dae sa ràdiu. At a èssere a òbligu a presentare su rendicontu aziendale de s’annu antepostu a cussu pro su cale si pedit su contributu.
Sa redatzione at a dèpere tènnere nessi duos dipendentes, unu diretore responsàbile iscritu a s’albu e èssere gestore de retze.
Intro sas ispesas amìtidas bi sunt sa produtzione e realizatzione de sos programmas, sa tradutzione e condutzione in sardu, sa difusione e sa promotzione in àteros mèdias e sa SIAE.
Non sunt incluidas imbetzes sas ispesas de trasferta de sos dipendentes, s’autoprodutzione e s’achirimentu de ispàtzios promotzionales in àteras emitentes radiofònicas.
Semper e cando pro sas emitente televisisivas locales sunt arribende 2 miliones e 400 mìgia èuros punnados a sa “valorizatzione de sa cultura, de sa limba e de sas traditziones de sa Sardigna”, giustificados cun sa crisi econòmica. Su tèrmine “traditzione” est semper presente, ma non si ischit efetivamente cantu at a andare a sa limba sarda o a programmas in italianu de cultura regionale.
Leave a comment