Foto de Bobore Taras
Pro ammentare Sa Die de sa Sardigna 2026 su sòtziu tataresu Sa Domo de Totus, paris cun Teatro S’Arza, at organizadu su 28 de abrile unu cunvegnu intituladu Sassari tzitade rivolutzionària.
In sa Sala Angioy de sa provìntzia de Tàtari, in pratza d’Italia, sos reladores Federico Francioni, Adriana Valenti Sabouret, Omar Onnis e Cristiano Sabino, ant ofertu a su pùblicu unu resùmene de sa ricurrèntzia e de cuddos tempos de sa rivolutzione sarda.
S’istòricu Federico Francioni at presentadu unu cuadru generale e at faeddadu de sas particularidades de sos avolotos antifeudales in Sardigna, chi, a diferèntzia de àteros logos, no ant bidu una reatzione de genia sanfedista, bidu finas ca intre sos rivolutzionàrios ddo’aiat paritzos satzerdotos.
Adriana Valenti, autore intre sas àteras publicatziones de I rivoluzionari sardi in Francia, at afrontadu sa figura de Angioy finas dae unu de bista privadu.
Est essida a pìgiu sa figura de Catherine Dupont, chi aiat acollidu a Angioy in su disterru pariginu e chi non fiat resurtada a otènnere dae sas fìgia de s’Alternòs su chi issu dd’aiat lassadu in eredidade.
Onnis, istòricu e romanzieri, at espostu s’idea chi su Achille della Sarda liberazione e su Patriotu sardu a sos feudatàrios fiant duos documentos, a pàrrere suo, elaborados dae sa matessi élite rivolutzionària. Cunforma a custa teoria Procurade ‘e moderare diat èssere istadu firmadu dae Mannu ma fiat frutu de unu traballu colletivu.
Sabino, in rapresentàntzia de Sa Domo de Totus, at espressadu su cumbinchimentu chi est creschende sa sensibilidade, pro Sa Die de sa Sardigna in generale e finas pro cuddu tempus de s’istòria sarda. Pro more de s’atividade sua de professore in sas iscolas superiores, at naradu, at pòdidu registrare custa crèschida de interessu intre sos istudiantes.
A pustis de su cunvegnu su Teatru S’Arza at ofertu una rapresentatzione itinerante a tema, cun sa regia de Romano Foddai, in pratza d’Italia, pratza Castello e pratza Rosario.
S’initziativa fiat parte de su cartellone Primavere Sarde, organizadu dae Sa Domo de Totus e Teatro S’Arza, chi dae su 24 a su 28 de abrile, at propostu cunvegnos, tzerimònias, teatru e mùsica dedicados a sa festa natzionale sarda.
(gianni muroni)
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment