Su 14 de cabudanni de su 1993 cun lege regionale n.44 sa R.A.S. at istituidu sa Die de sa Sardigna. Sa die seberada pro afestare su pòpulu sardu est su 28 de abrile, in ammentu de sa chi in Casteddu est connota comente sa dì de s’aciappa. Cudda die de su 1794 sos sardos nch’aiant catzadu a su vitzerrè Balbiano e a totu sos prus de chimbighentos funtzionàrios sabàudos.
S’annu in antis sos frantzesos aiant chircadu de invàdere sa Sardigna ma siat sos casteddajos siat sos madaleninos aiant resìstidu gherrende contra a sa marina transalpina.
Sos sardos diant àere chertu chi s’istadu esseret reconnotu s’isfortzu issoro riservende·ddis prus logu in s’amministratzione pùblica. Sa detzisione imbetzes de dare sas càrrigas prus importantes a sos istràngios, semper prus prepotentes, aiat fatu inchietare sa populatzione.
Su 4 de maju fiat dèpida cumintzare s’insurretzione ma cando dd’aiat ischidu su vitzerrè, avisadu dae una lìtera anònima, aiat ordinadu s’arrestu de sos capos rivolutzionàrios.
Protagonistas de sos fatos fiant Vincenzo Cabras, tonaresu, membru de s’istamentu reale in su parlamentu de su Regnu de Sardigna e giai procuradore de Tàtari e de Casteddusardu, e su giurista e poete Efisio Pintor, casteddaju. S’arrestu issoro aiat iscadenadu sa rebellia.
A sos piemontesos cun incàrrigos in s’Ìsula nche ddos aiant imbarcados e fatos partire dae Casteddu e dae Portu Turres.
Cabras e Pintus a coa aiant leadu positziones prus moderadas, tantu de bènnere a èssere oposidores de Zommaria Angioy e de sa rivolutzione sua.
A sa Die de Sardigna sunt istadas dedicadas òperas chi cherent ammentare cuddu momentu de unidade e orgòlliu natzionale. Intre custas Sa dì de s’aciapa, dramma storico in due tempi e sette quadri. Su testu est de Piero Marcialis e sa prima editzione est istada publicada dae Condaghes in su 1996.
De ocannu est sa realizatzione de 28 abrile 1794: sa die de sa Sardigna, unu filmi de animatzione realizadu semper dae sas editziones Condaghes cun sa regia de Bruno Olivieri. Inoghe si podet bìdere s’anteprima.
(gianni muroni)
Leave a comment