Forsis non semus abituados a intèndere o a lèghere de isciòperos in Amèrica. Valerio Evangelisti nos at contadu s’epopea de sos Industrial workers of the World in su romanzu suo One Big Union, ma est cosa betza. Àteras bortas amus bidu pellìculas comente Bread and Roses de Ken Loach cun is dipendentes de sas impresas de pulitzia in protesta. E fintzas de Detroit amus intesu, sos annos trinta de su sèculu coladu. Como però sos bratzos rugrados, in cussu Midwest nòdidu, sunt sos de sos traballadores de sos istabilimentos de totu sos tres colossos automobilìsticos, sos big three: General Motors, Ford e Stellantis. S’isciòperu est comintzadu in pare cun s’iscadèntzia de su cuntratu betzu, est a nàrrere su 15 de cadudanni. Ma si sa noa a tretos nostros est lòmpida che tronu in die sena nues, s’idea de iscioperare no est de custas oras. Giai dae su mese coladu 150mìgia aderentes a su sindacadu Uaw (United auto workers – International union) aiant votadu chi emmo a custa forma de protesta in ausèntzia de aumentos dèghidos de paga (su 30%). Si faeddat de un’isciòperu sena pretzedentes e custu faghet cumprèndere chi sas organizatziones de sos traballadores podent fintzas mudare cunforma a sas pressiones dae bassu. Su sindacadu Uaw, fintzas a pagu tempus a como aiat una diretzione prus chi no cuntzertativa e su 2008 renuntzieit a su Cola (cost ol living adjustment, un’ispètzia de iscala mòbile) pro sarvare su setore. Sos buròcrates sindacalistas fiant prus in paghe cun sos meres de sos big three chi non cun sos iscritos traballadores. Chi a bellu a bellu ant postu un’àteru leader, Shawn Fain (in foto cun Bernie Sanders), meda prus cumbativu. Sa diretzione noa nch’at imboladu a s’arga sas propostas de sos meres e sos traballadores ant comintzadu a s’organizare in cada istabilimentu publitzizende sa vertèntzia cun passèntzia e aficu. Su contu chi nd’essit a pìgiu est chi sos dipendentes de s’àuto non sunt s’aristocratzia operaja de unu tempus, belle una middle class. Sos meres sunt acumulende semper prus profitos. Sos traballadores cherent aumentos dèghidos pro chi si potzat bìvere. E custa batalla est petzi un’indicadore de su chi bi podet acontèssere in sos Istados unidos.
màuru piredda
Leave a comment