– de Salvatore Serra –
“Democratzia proletària sarda est unu partidu polìticu, nazionalitàriu e de classe chi, assumende sas bases teòricas fundamentales de su marxismu revoluzionàriu, punnat a sa trasformatzione sotzialista de sos raportos sotziales de produtzione e de su sistema polìticu, fundadu in s’isvilupu ampru de sa democratzia direta, de su protagonismu sotziale, de sas libertades individuales, de s’autogestione. Dps est impinnada in sa pelea pro truncare sa cunditzione atuale de dipendèntzia coloniale de sa Sardigna, pro s’autodeterminatzione e s’autoguvernu de su pòpulu sardu. Dps est federada a Dp italiana, reconnoschende·si in su progetu comunu cumplessivu de trasformatzione sotzialista de sa sotziedade. Custu raportu est santzionadu in manera formale dae unu patu federativu chi est parte integrante de s’istatutu.”
(dae s’istatutu de Dps, art. 1, tradutz mea.)
…………………………………………………………..
S’esperièntzia polìtica de Dps nche torrat a sos annos 80 de su sèculu coladu. Est istadu un’eventu raru. Ca totu sos partidos italianos fiant e sunt istruturados in manera tzentralizada. E sos militantes locales depent petzi pònnere mente, comente chi siant funtzionàrios de un’amministratzione pùblica. Democrazia Proletaria nono. Aiat atzetadu chi sos militantes sardos esserent autònomos, antzis, federados. E aiat atzetadu finas su programma de DPS pro su bilinguismu perfetu. Su volantinu chi pùblico oe est petzi una mustra de custu indiritzu polìticu.
Leave a comment