S’annu coladu in Sant’Antine de Sèdilo b’aiat politzia e carabineris pro non fàghere colare a nemos: sa timòria fiat chi sa gana de festare poderet barigare sas medidas contra a su Covid, fintzas si pagu bi nd’aiat a tràvigu. Eris su pàrracu de Putumajore at acraridu chi sa cursa non s’at a fàghere, sa matessi noa chi at dadu su preìderu de Sèdilo una chida a como. Prus de unu suddidu b’aiat dae meda, ma como est lòmpida sa cunfirma.
Unu acòrdiu intre Crèsia e Istadu vedat sas professones, e fintzas si como si sunt aberende cale si siat tzilleris e osteras, manifestatziones comente a custas non s’ammanìgiant in pagas dies. B’at bisòngiu de annestrare sos caddos e de sestare sas iscuadras de sos chi current. Custu Sant’Antine s’at a festare in manera religiosa, cun pregadorias e missas. Sas Àrdias sunt iscostiadas de un’àteru annu, a dolu mannu.
(redatzione)
Leave a comment