Istudiare sas matèrias STEM e s’informàtica no est prus petzi unu sèberu acadèmicu, ma una netzessidade istratègica pro cumprèndere e guvernare sas trasformatziones de su tempus nostru. In unu mundu semper prus mediadu dae sos algoritmos, sa cumpetèntzia tecnològica rapresentat sa crae pro s’autodeterminatzione e sa libertade. Mescamente sa de sas fèminas.
Est in custu surcu chi s’est inserida sa missione sarda de Darya Majidi, imprendidora e ativista italo-iraniana, chi at serradu in s’Istitutu tècnicu “Luigi Oggiano” de Thiniscole unu giru dedicadu a promòvere sas carrieras iscientìficas intre sas generatziones noas. Testimonial de su Progetu Margherita, initziativa chi intregat omenàgiu a s’astrofìsica Margherita Hack, Majidi at trasformadu sas arresonadas suas cun sas istudiantes in unu manifestu pro unu tempus benidore cun 6C: cussèntzia, cultura, cumpetèntzias, coro, coràgiu e comunidade.
Su percursu propostu movet dae sa cultura comente antìdotu a sos pregiudìtzios, dae s’ètica netzessària pro ghiare s’intelligèntzia artifitziale e dae sa batalla fitiana pro bortulare sos istereòtipos chi diant chèrrere sas fèminas prus pagu adatas s sas disciplinas tècnicas. S’informàtica e s’IA, non de s’èssere territòrios petzi maschiles, bogant a campu totu sas possibilidades de libertade. Est in contu de custas novidade chi Majidi at chèrfidu istèrrere s’ammonestu suo: ca s’automazione podet corfire totu sos traballos cun pagu valore chi a s’ispissu sunt lassados a sas fèminas.
«No est beru chi non seis adatas a s’informàtica – at naradu -, punnade a s’indipendèntzia econòmica». Su giru, sustènnidu dae su Fundu pro sa Repubblica Digitale e gestidu dae sa Cooperativa Lariso cun s’agentzia Formatica, at interessadu fintzas unas cantas iscolas superiores (intre litzeos e istitutos tècnicos) de Nùgoro, promovende una “sorellàntzia digitale” e s’invitu a barigare sas barrieras culturales pro abitare su cras cun cumpetèntzia e sena timòrias.
Gianfranca Orunesu
__________________________________________________________________________________________________________________________________________________
Attività realizzata col contributo della Regione Sardegna – IMPRENTAS 2025-2026. LR 22/2018, art. 22
Leave a comment